Imphal, Nailar:
Ki shipai ïada khappud ki la ïoh ban kurup ïa saw tylli ki tiar siat, 38 tylli ki kuli bad 8 tylli ki bom na Imphal East distrik bad Imphal West distrik ha ka por ba la pynlong ïa ka jingkhynra bad ka jingleit pahara, la ïathuh ki pulit. Ïa ka jingleit khynra la pynlong ha kiba bun ki thaiñ kiba don ha Imphal East, Imphal West, Kakching, Kangpokpi bad Thoubal distrik ha kaba ka kynhun shipai ka la ïoh ban kurup ïa ki tiar siat, ki kuli bad ki bom, la ong ka jingthoh ba la phah da ka Manipur Police Control Room ha ka miet jong ka sngi Palei.
Ki la don baroh kumba 123 tylli ki Naka ba la buh ha ki distrik bapher bapher jong ka Manipur, baroh ar, kata ha ki jaka lum bad ki jaka ba long them bad ki pulit ki la ïoh ban kem ïa 1,581 ngut ki briew ha kaba ïadei bad ki jingjia jong ki jingïakynad kiba la mih ha ki distrik bapher bapher jong ka jylla, la ong ka jingthoh.
