Shillong, Nailar 25
Ka St Anthony’s College, Shillong, ka Morningstar College bad ka Seng Khasi College ki la khur jingjop ha ka lympung ïalehkai phutbol ka NEHU Inter College Football (Men) Tournament 2023 kaba la long ha ka sngi Thohdieng ha madan ïalehkai ka SAI ha NEHU.
Haba phai sha ka jingïalehkai kaba nyngkong, ka St. Anthony’s College ka la lah ban pynliem da kaba suk ïa ka Ri-Bhoi College, Nongpoh kata da 5-0 kol. Watla ka Ri-Bhoi College ka la lah ban khur jingjop ha ki jingïalehkai ba la dep, hynrei ha kane ka jingïakhun kam shym la lah ban shan hakhmat ki rangïalehkai ka St Anthony’s.
Ha kawei pat ka jingïalehkai jong kane ka lympung, ka Morningstar College ka la lah ban pynliem noh ïa ka Sohra Govt. College, Sohra da 3-0 kol.
Haba phai pat sha ka jingïakhun kaba khatduh jong kane ka sngi, ka Seng Khasi College, Shillong ka la lah ban pynliem noh ïa ka Union Christian College, Umiam da 3-1 kol.
Ki jingïalehkai ha kane ka sngi, ki la long kiba itynnad bad ha kaba ki rangïalehkai na ki college bapher bapher ki la pynpaw ïa la ka sap ïalehkai kaba la pynhun ïa ki nongpeit bad ruh ki nongpynïaid.
Ki jingïalehkai ki ban long pat ha ka 26 tarik mynta u bnai, kata ha ka bynta kaba-ar ne Second Round, ka Smit College, Shillong kan ïakhun pyrshah ïa ka Kiang Nangbah Govt. College ha ka por 8.15 mynstep, ka Shillong Commerce College kan ïakhun pyrshah ïa ka JJM Nicholas Roy College ha ka por 10 baje mynstep, bad ka Riwar College, Pynursla kan ïakhun pyrshah ïa ka St. Edmunds College ha ka por 12 baje mynsngi.
