Brooklyn, Nailar:
Kawei ka longkmie 43 snem ka rta, ka la duh noh la ka jingim hadien ka jingshah thombor ha uwei u briew uba sah lang ha kajuh ka ïing mala ba ki shong wai hapoh Brooklyn. Ha kane ka jingjia utei u briew u la leit ban tied naphang ia kat kiba don ha katei ka iing da u tyrnem ba u rah ha ka kti ha kaba 2 ngut ki khun jong ka pat ki la mynsaw jur hadien ka jingshah tied dusmon ha utei u briew ha katei ka jingjia.
Kane ka la jia ha ka Sngi Balang, ha kaba ki pulit ki la ioh kem noh syndon ia utei u rangbah 47 snem na katei hi ka jaka.
Ki pulit ki la buhrieh ia ka kyrteng jong katei ka briew bad jong utei u rangbah katba ym pat lap ia ka daw bad ka jingshisha baroh, hynrei ki la shu pyntip tang ia ka snem jong kitei ki ar ngut ki khun jong katei ka briew, kiba kynthup ia utei u khyllung 5 snem bad ka khyllung ba dang 3 snem ka rta.
La ong ba ki pulit ha ka por ba ki leit poi ha katei ka iing, ki lap ia katei ka briew bad ki 2 ngut ki khun jongka hapoh jong kawei ka kamra jong ka mala kaba 2 ha kaba ki shong- ki sah. Kumjuh ruh ki la ioh kem noh shwa ia utei u rangbah uba thmu ban phet noh na katei ka jaka ha ka por ba ki pulit ki dang shu poi bad ki la shem ruh ia u ha ryngkat ka snam kaba la satah ha ki jaiñ ki nep jong u.
La ong ba katei ka briew ka sah mar shiliang kynrad bad utei u briew uba sah lang bad u khun ba 9 snem jong u.
Watla ki pulit ki la ialeh ban pynkit mar-mar ia kitei ki 3 ngut sha ka hospital NYU Langone kaba don ha Brooklyn, hynrei ki doktor ki la pyntip ba katei ka longkmie ka la khlad noh naduh ka por shuwa ban poi hapoh ka jaka sumar. Katba kitei ki 2 ngut ki khun jongka pat ki don hapdeng ka jingsumar kaba bniah namar ka jingmynsaw kaba la jur.
Ki pulit ki la lap ruh ia u tyrnem uba la satah snam na katei ka iing ba sah utei u runar ha katei hi ka jingleit poi jong ki.
