Shillong, Nailar 25
Ïa ka lympung ïalehkai ba la tip kum ka BSF Inter Frontier Games of Judo, Wushu, Gymnastics bad Taekwondo la pynhap pyrda noh ha ka sngi Thohdieng ha ka jingïalang kaba iphuh iphieng ba la long ha NEHU Shillong. Ha kane ka lympung kaba saw sngi, haduh kumba 700 ngut ki nongïalehkai na ki 11 tylli ki Frontiers jong ka Border Security Force ki la wan ïashim bynta.
Ha kane ka sngi pynhap pyrda, ka Sonali Mishra, IPS, ADG, BSF (Eastern Command) Kol-kata ka la ïadon lang kum ka kongsan ryngkat lang u Pradip Kumar, IPS, IG BSF, Meghalaya Frontier, u Prof. Prabha Shankar Sukla, Vice Chancellor jong ka NEHU, u TS Chavan, AD Sports Authority of India, ki ophisar rangbah jong ka BSF.
Ïa kane ka sngi pynhap pyrda, la sdang da ka jingïaid march past, ha kaba ki kynhun na ki frontiers bapher bapher ki la ïashim bynta shitrhem bad hadien kane, la pynbud da ki prokram tynrai ba la ai da ki khynnah ka skul BSF bad ruh ki shipai BSF.
Ha kane ka sngi ka ADG ka la pynkup burom ruh ïa ki nongjop ha ki jingïalehkai bapher bapher kum ka judo, Wushu, Gymnastics, Taekwondo.
Haba ai jingkren ha kane ka sngi, ka Sonali Mishra, IPS, ADG, BSF (Eastern Command) Kolkata ka la ban halor ka jingdonkam jong ki kam ïalehkai ban tei ïa ka imlang sahlang kaba khlaiñ bad ba koit ba khiah.
Ka kongsan ka la kdew ruh ba kum kine ki jingïakop ym tang ba ki pynpaw ïa ka jingkhlaiñ ha ka bor met hynrei ban noh synñiang ruh ha kaba ïadei bad ka jingmut jingpyrkhat jong ki nongïashim bynta.
Haba phai sha ki nongjop jong kane ka lympung, ha ka jingïakop Judo, ka Gujarat ka la wan ba nyngkong, ka Jammu ba-ar. Ha ka Wushu pat ka Punjab ka la wan ba nyngkong bad ka Jammu ba-ar. Ha ka Gymnastics ka Jammu ka la wan ba nyngkong, katba ka Kashmir ba-ar bad haba phai sha ka Taekwondo, ka South Bengal ka la wan ba nyngkong bad ka Tripura ba-ar.
