Brasilia, Nailar:
Katkum ki khubor la ong ba ki pulit jong ka Brazil ha ka Sngi Palei, ki la leit khynra ha ka iing sah jong u khun u President barim katei ka ri u Jair Bolsonaro namar ka jingsuba don kti ha ki kam bei tyngka pisa be-aiñ.
La ong ba ki heh pulit ki la leit ban khynra ha ka iing sah u khun ba 25 snem jong u Bolsonaro hapoh Camboriu, kaba don sha ka phang Shathie jong ka Santa Catarina bad ki la ïoh kurup noh ruh ia kawei ka mobile phone, ki ‘Hard Drive’ bad ki kopi ba thoh jingthoh jong utei u samla ha katei ka sngi.
Ia utei u khun la ju ithuh kum u Jair Renan Bolsonaro bad u trei hapoh Santa Catarina. Na ka liang u Renan u dap da ka jinglyngngoh ha ka por ba ki heh na ka kynhun pulit ki leit ban khynra ha ka iing jong u ha katei ka sngi.
Ki pulit ki la leit ruh ban khynra ha ka nongbah Brasilia haba iadei bad ka jingiadon bynta jong ka iing u Bolsonaro ha ki kam bei tyngka be-aiñ sha ki kompeni bapher hapoh ka ri.
U Jair Renan dang shen ruh u dang lait na ka kti jingtohkit ki pulit ha u snem 2021, ha kaba ki heh pulit ki la tohkit bniah ia u halor ka jingsuba bam sap pisa ba ki heh nongkhaïi ki siew tang ban pynïoh kontrak ia ki bad ka sorkar.
