Agartala, Nailar:
Ka la don ka jingshah ktah jur hapoh ka seng ka liang pyrshah ka Congress ha Tripura, naba u Working President jong ka bad u Myntri barim u Billal Mia, uba la iehnoh kam na ka seng ha ka sngi Balang, u la leit ban pynïasoh bad ka seng BJP ha ka sngi Palei.
Une u nongïalam uba la 63 snem ka rta u la leit ban pynïasoh bad ka seng BJP ha ka sngi Palei ha ka prokram kaba la pynlong ha Kulubari kaba don ha Sepahijala distrik.
U Myntri Rangbah jong ka jylla u Manik Saha, u President jong ka seng BJP ha ka jylla u Rajib Bhattacharjee, bad kiba bun ki Myntri bad ki heh nongïalam jong ka seng, ki la ai ka jingkhublei kitbok-kitrwiang ïa u Mia, uba long u nongïalam jong ka kynhun ki Muslim ha ka seng Congress.
