Shillong, Nailar 25
U rangïalehkai dien jong ka Spain u Aymeric Laporte u la mih noh na ka Manchester City ban leit pynïasoh sha ka Al Nassr ha ka lympung Saudi Pro League ha ka dor kaba la kot sha ka 27.5m euros (£23.6m).
Une u rangïalehkai ba la 29 snem ka rta u la pynïasoh sha ka City na ka Athletic Bilbao ha u Kyllalyngkot jong u snem 2018 ha ka dor kaba la kot sha ka £57m.
Ha ka jingdon bad ka City, u la ïarap ïa ka club ban khur haduh 12 tylli ki nam lahduh kiba heh, hynrei ha ka aiom kaba la leit, u la mih madan tang 24 sien, ha kaba ka Manchester City ka la khur ïa ki 3 tylli ki nam lahduh ba heh jong ka dewbah Europe.
Ka daw ba la pynlong ïa u Laporte ban mih noh, ka dei namar ba u la sdang ban shah kiar hapoh ka City, da ka jingkiew ki rangïalehkai dien kum u Manuel Akanji bad u Nathan Ake bad kaba la kham pynduh mynsiem shuh, ka dei hadien ba ka City ka la wad ban thied sa ïa u Josko Gvardiol na ka RB Leipzig.
Dei halor kane, ba une u rangïalehkai ka Spain u la rai ban mih noh na ka City bad leit pynïasoh sha ka Al-Nassr ha ka SPL.
Ha ka kyrwoh ai khu-blei ha ka rynsan social media, u Laporte u la ai khublei ïa ki nongkyrshan ka club bad ki para nong-ïalehkai.
Naduh ba la pynïasoh, u Laporte u la ïoh mih madan haduh 180 sien na ka bynta ka City, bad ban khyrwit haduh 12 tylli ki kol.
Kumba ka long mynta, la lah ban sngewthuh ba ka jingkhring jong ki club na Saudi Arabia ka la jur bha khamtam ïa ki rang-ïalehkai ba paw na ka dewbah Europe bad na kiwei ki ri jong ka pyrthei, hato ka lah ban dei na ka jingeh ka pisa.
