Washington, Nailar:
U President ka United States, u Joe Biden ha ka Sngi Balang, u la ong ba um don jingsngew pher ne sngew phylla eiei halor ka jingiap u heh ka kynhun shipai Wagner- u Yevgeny Prigozhin kumba la pynbna ba u la khlad noh namar ka jinghap ka liengsuiñ kaba kit ia u ha Russia.
Kumta, u Biden u la ong ba um tip ia ka jingshisha halor kaei kaba jia ha katei ka por, hynrei um sngew pher halor katei ka jingiap jong u namar la tip ba ka Russia kan pyniap beit ia u shisien ka sngi.
Kumjuh ruh u Biden u la ong ba kam don kaei- kaei ruh kaba jia hapoh Russia, ka ban jia khlem ka jingtip jong u President ka Russia- u Vladimir Putin. Kumta ka jingiap jong utei u heh nongialam ka tnat shipai ruh ka dei ka jingthmu jong u Putin na sha lyndet.
La ong ba ka kyrteng jong u Prigozhin ka don hapoh ka thup kyrteng jong ki pasenjar kiba shong ha katei ka liengsuiñ kaba la hap noh ha ka phang Northwest jong ka Russia ha ki sngi ba la lah.
Namar la ong ba u Prigozhin u long u nongbud ba ha kti- ha kjat jong u President ka Russia ha ki por ba la leit. Hynrei ka jingwan paw pyrthei jong u hapdeng ka jingleit hiar thma ka Russia ka long hadien ba utei u nongialam u la sei ia ka kynhun shipai ban ialeh pyrshah ia ki shipai ka Russia halor ka jingleit hiar thma ba khlem nongrim jongki pyrshah ia ka Ukraine kaba dang long ka ri kaba dang rit lada ianujor ia ka bor bad ka jingkot jongka hakhmat jong ka Russia.
