New Delhi, Nailar:
Ka Supreme Court ka la hukum ïa u Chief Justice jong ka Gauhati High Court ba un bthah ïa ki ïingbishar ha Guwahati ba kin bishar bniah halor kiba bun ki jingjia kiba ïadei bad ki kynrum kynram bad ki jingïakynad kiba la jia ha Manipur ïa kaba la aiti sha ka kynhun Central Bureau of Investigation (CBI).
Ka ïingbishar ha kaba ïadei bad kane, ka la ong ba ki nongshah thombor bad ki nongsakhi halor ki jingjia kin sa lah ban ai ïa ki sakhi halor ka jingjia napoh ïing jong ki ha Manipur ha ka jaka ba kin leit dalade sha ka ïingbishar ha Assam. Ïa kane ka hukum la pynmih da ka kynhun nongbishar jong u Chief Justice DY Chandrachud, JB Pardiwala, bad Manoj Misra, hadien ka jingkyrpad jong u Solicitor General of India u Tushar Mehta ha ka kyrteng jong ka jylla Manipur.
