Jowai, Nailar 25
Ka Mooknor Thadmuthlong Sports Club ka la khur jingjop ha ka lympung ïalehkai 2nd Division Football Tournament-6th Debo Shullai Memorial Trophy ba la pynïaid da ka West Jaiñtia District Sports Association (WJDSA).
Kane ka la wan hadien ba ka Mooknor Thadmuthlong SC ka la lah ban pynliem noh ïa ka Lion Sports Club da 3-2 kol ha ka jingïakhun kaba la long ha madan Kiang Nangbah Stadium Ladthad-laboh ha ka sngi Thohdieng.
Ïa ka kol jong ka Mooknor Thadmuthlong SC la thep da u Phrangki Sari ha ka minit kaba 58, u Style Sana ha ka minit ba 78 bad u Balanstar Suchiang ha ka minit ba 80. Katba ïa ka kol jong ka Lion SC la thep da u Banteidor Syngkrem ha ka minit kaba 27 bad u Arkini Laloo ha ka minit ba 60.
Katba ha kawei pat ka jingïalehkai jong kane ka sngi, kata kaba la long hapdeng ka Chilliangraij Sports Club pyrshah ïa ka NSA ka la kut noh ha ka jingïakhaid ha kaba ym shym la don satia kiba la ïoh ban pynkhih jar haduh ba kut hynrei ban shu hun noh ban ïasam mar shi point.
