Shillong, Nailar 25
U Neeraj Chopra u la lah ban pynpaw pyrthei ïa ka jingtbit hadien ba u la lah ban kawang haduh 88.77 meter tang ha ka sien kaba nyngkong bad ban ïoh rung syndon sha ka final jong ka Men’s Javelin Throw ha ka lympung World Athle-tics Championships ka ban long ha Budapest, Hungary.
U Neeraj uba la khur takma ksiar ha ka Olympic, tang ha ka jingkawang ha ka sien ba nyngkong u la lah ban plie ka jingkhang sha ka final, ka ban long ha ka sngi U Blei. Ka jingjngai kaba la buh ban rung sha ka final ka dei 83m hynrei u Neeraj u la kawang haduh 88.77m.
Ym tang ba u la rung sha ka final, hynrei da kane ka jinglah ban kawang jngai ka la pynlong ruh ïa u Neeraj ban ïoh buh jaka lypa sha ka lympung Paris Olympics 2024, naba ka jingjngai ba la buh ka dei 85.50m.
Ha kane ka jingïakop,tang u Julian Webber jong ka Germany, u la dei uwei pat u rangïalehkai na ka set A uba la lah ban kawang palat ïa ka 80m ha ka sien kawang kaba nyngkong. Kiwei pat ki 15 ngut ki nongïalehkai na kane ka set, kim shym la lah ban shim kabu ban ïoh rung wat hadien lai sien ka jingpyrshang.
U DP Manu, uba dei uwei pat u rangïalehkai ka India, u la lah ban pyndep ha ka kyrdan kaba lai da kaba kawang 81.31m hadien jong u Webber (82.39m) u la ïoh rung sha ka final ryngkat bad u Kishore Jena, uba la pyndep ha ka kyrdan kaba san ha ka Group B da kaba kawang 80.55m.
Katba u Arshad Nadeem ka Pakistan u la kawang 86.79m bad u Jakub Vadlejch 83.50m kiba dei na ka Group B, kiba la ïoh rung lang sha ka final.
Katba u lahduh jong katei ka lympung ha ka aiom ba la lah, u Ander-son Peters u la duh noh ka lad ban rung hadien ba u la kawang jngai tang 78.49 hadien ki jingpyrshang haduh 3 sien, ha kaba u la pyndep ha ka kyrdan kaba 7 ha ka Group A bad mynta un hap ban khmih lynti ba kiba bun ki rangïalehkai na ka group B kin nym lah ban leh bha, ba kan plie ka lad ïa u.
U Neeraj uba la khur ka takma rupa ha ka sien ba la dep jong ka lympung World Championships, mynta un phai khmat ban khur ka takma ksiar, kumba ka long mynta u Neeraj u la jop takma ksiar ha ka Tokyo Olympic. U la khur takma ksiar ha ka Asian Games bad Commonwealth Games bad ruh ha ka Diamond League champion.
