Khliehriat, Nailar 25
Ka Ratacherra Cultural Sports Club bad ka Bataw Football Club ki la ïoh ban buh jaka ïalade sha ka jingïakhun jong ka wat kaba ar (second round) ha ka lympung ïalehkai 3rd Division Football Tournament ïa kaba la pynïaid da ka East Jaintia Hills District Football Association.
Kane ka jinglah jong kitei ki ar tylli ki club ka la wan hadien ba ki la khur jingjop ha ka jingïakhun jong ka wat kaba nyngkong kaba la long ha madan Artificial Turf Diengshynrum ha ka sngi Thohdieng.
Haba phai sha ka jingïakhun kaba nyngkong, ka Mulieh Youth Social & Sports Club ka la lah ban pynliem noh ïa ka Umlong United Sports Club da 2-1 kol. Ïa ki kol jong ka Mulieh Youth la ïoh ban thep da u Hamedahun Lamurong ha ka minit kaba 54 bad 67 katba ïa ka kol jong ka Umlong United la thep da u Sikel Nyalang ha ka minit kaba 31.
Haba phai pat sha kawei ka jingïakhun, ka Bataw Football Club ka la lah ban pynliem noh ïa ka Nongthymme Sports Club da 3-0 kol. Ïa kine ki kol jong ka Bataw FC la ïoh ban thep da u Benison Suchiang ha ka minit kaba 19, u Dameshwa Byrloi ha ka minit kaba 23 bad 59.
Ha ka jingïalehkai kaba khatduh jong kane ka sngi, ka Ratacherra CSC ka la lah ban pynliem noh ïa ka Wapung Shnong Sports Club da 2-1 kol.
Ïa ki kol jong ka Ratacherra la ïoh ban thep da u Sumer Nongrum ha ka minit kaba 7, u Shining Star Myrmen ha ka minit kaba 15 katba ïa ka kol jong ka Wapung Shnong la thep da u Helpme Dkhar ha ka minit kaba 54.
