Moscow, Nailar:
U President ka Russia, u Vladimir Putin ha ka Sngi Palei u la kren shaphang ka jingiap jong u heh ka kynhun shipai Wagner u Yevgeny Prigozhin bad kumjuh ruh ka jingiap jong ki katto katne ki heh katei ka kynhun ha ka jinghap liengsuiñ ha ki khyndiat sngi ba la leit.
Kumjuh ruh haba iadei bad ka jingiadei hapdeng jong u bad utei u heh jong ka Wagner kaba la ialeh pyrshah ia ki shipai ka Russia hapdeng ka jing-iakhun thma jong ka Russia pyrshah ia ka Ukraine, u Putin u la ong ba u Prigozhin u long u briew uba shemphang bad uba don sap bha, hynrei baroh ka long tang ka jingbakla ka rukom pyrkhat-pyrdaiñ jong u, ba u poi ialeh pyrshah pynban ia ka sorkar lajong.
Haba ai jingkren sha ki lad pathai khubor ha katei ka sngi, u Putin u la phah ia ka khubor sngewlem sha ka iing ka sem jong kitei kiba khlad baroh, ha kaba 9 ngut ki briew kiba don lang hapoh jong katei ka liengsuiñ ba shong utei u heh ka kynhun Wagner, ki la khlad lang ha ka jinghap katei ka liengsuiñ.
Kane ka jingkren jong u Putin, ka long ka jingpyntikna ba u heh jong ka kynhun Wagner u la khlad shisha. Ka long ruh ka sien ba nyngkong ba u Putin un kren shaphang katei ka jingjia naduh ba la jia katei ka jingjia ha ka janmiet Sngi Balang.
Kumjuh ruh na ka liang u President ka Ukraine, u Volodymyr Zelensky u la ong ba ka Ukraine kam shym don bynta eiei ha kane ka jingjia hynrei baroh hi ki tip ia kaei kaba don sha lyndet jong katei ka jingjia, namar kiei- kiei kiba jia hapoh ka ri Russia ki long katkum ka jingpyniaid bad ka jingthmu jong u President ka Russia.
