Shillong, Nailar 25
Kum shi bynta ban kynmaw burom ïa ka lyngkhuh sngi kha jong u rangïalehkai Hockey ka India, u Major Dhyan Chand, ka Sports Authority of India (SAI) kan rakhe ïa ka National Sports Day ha ka 29 tarik mynta u bnai.
Kumta na ka liang jong ka SAI, STC, Shillong kan pynlong ïa kiba bun ki jait jingïalehkai ha kane ka sngi, da ka jingïashim bynta da ki nongïalehkai, ki Coach bad baroh ki nongtrei ophis. Ka STC, Shillong kan pynlong ïa ki jingïalehkai ba kynthup ïa ka Volleyball, Football Penalty Shootout, Badminton, 4X100m Relay Race, ka Lemon and Spoon Race, Tug of War, Three Leged Race bad ïa kine ki jingïalehkai baroh yn pynlong ha madan SAI STC ha campus NEHU.
Ha kane ka sngi, u nongïalehkai phutbol ba paw ka Jylla u Bah Eugeneson Lyngdoh, uba dei ruh u MLA barim ka Mawphlang un ïadon lang kum u kongsan nalor kiwei kiwei.
