Shillong, Nailar 27
Ka North-Eastern Hill University Teachers’ Association (NEHUTA) ka la ai por 5 sngi ïa u Vice-Chancellor (VC) ka North Eastern Hill University (NEHU), u Prof. P.S. Shukla ban weng noh ïa ka shithi kaba la pynmih ha ka 12 tarik u Naitung, 2023 haba ïadei bad ka jingpyntreikam ïa ka National Education Policy (NEP) 2020, na bynta ka samoi pule 2023-24.
Ïa katei ka rai la shim ha ka jingïalang ba kyrkieh ka General Body Meeting ka NEHUTA kaba la long ha ka Sngi Saitjaiñ hapoh ka jingpynïaid u President, Prof. Lakhon Kma.
Ka shithi kaba la kdew da ka NEHUTA ka dei kaba la phah da u Officer on Special Duty (OSD), u Debashih Chowdhury sha ki Principal jong ki kolej kiba pynïasoh bad ka skulbah ban ïaid shakhmat bad ka jingpyntreikam ïa ka NEP lyngba ka ‘Four-Year Undergraduate Programme’ (FYUP) naduh ka jingsdang jong ka samoi pule 2023-24 – kaba ka seng ka sngew ba ka ïalam bakla bad kam ïahap.
Ka jingïalang ka la ïakren ruh ba ka jingpyntreikam (khlem ka jingmynjur lang jong kiwei) ïa ka NEP ha ka kyrdan pule UG naduh ka samoi pule 2023-24 da u VC ka long kaba be-aiñ bad kaba kyrkieh khlem ka jingmynjur jong ka Academic Council (AC) ka skulbah, ha kawei ka liang kaba pynkheiñ ïa ka aiñ ka NEHU, ki ‘Statute’ bad ki ‘Ordinance’.
“Ka jingpynkheiñ ïa ki hok jong ki ‘Statutory Body’ ka NEHU, kum ka AC, yn ym shah da lei-lei ruh em,” la ong ka kyrwoh na ki nongïalam ka NEHUTA.
Na ka liang ka seng ka la rai ruh ban ym ïashim bynta ha ka ban pynkhreh bad pynbeit ïa kino-kino ki sobjek pule jong ka ‘1st Semester’ katkum ka ‘Syllabus’ ka NEP ïa kaba la pyntreikam khlem ka jingmynjur lang jong kiwei, da ka jingkyrkieh bad ha ka rukom kaba be-aiñ (da u VC).
Ki nongïalam ki la ong ruh ba ïa ka mat halor ki ‘Model Question Paper’ katkum ka NEP na bynta ka ‘1st Semester’ ym shym la ïakren ne mynjur da ka AC bad kumta, kane kan pynlong ïa baroh ki kam ba ïadei bad ki eksamin katkum ka NEP na bynta ka ‘1st Semester’ jong ka samoi pule 2023-24 kaba be-aiñ bad ka bym treikam, ha kawei ka liang ka ban buh jingma kylla ïa ka lawei ki samla pule.
Ha katei ka jingïalang, ka seng ka la rai ruh ban thoh sha u Controller of Examination (COE), NEHU, ban weng noh mar-mar ïa ki mat katkum ka NEP na bynta ka ‘1st Semester’ naduh ka jingpynkhreh/pynbeit ïa ki jingkylli ha ki jingïalang bapher-bapher ban wan jong ka ‘Moderation Board’ na bynta ka eksamin ha ka kyrdan UG.
Ha kajuh ka por, ka jingïalang ka la kyrpad ïa ka Meghalaya College Teachers’ Association (MCTA) ban ym ïashim bynta ha ka ban pynkhreh/pynbeit ïa ki jingkylli jong ka ‘1st Semester’ hapoh ka NEP.
“La rai ruh ba lada jia ba katto-katne ki bym dei dkhot ka NEHUTA ki kwah ban ïaid shakhmat bad ka jingpynbeit katkum ka NEP, ki dkhot ka NEHUTA ki dei mih noh na ka jingïalang kum ka dak ka jingpyrshah jong ki,” ong ki nongïalam.
Shuh shuh ka jingïalang ka la rai ba ka NEHUTA kan long kaba peitngor ha ki sngi ba pynlong ïa ki ‘Moderation Meeting’ ban pyntikna ba kine ki rai ki treikam ym tang ha ka jingthoh hynrei ka kam kumjuh.
“Lada jia ba u VC um weng ïa katei ka shithi jong ka 12 tarik u Naitung, kata kan pynbor ïa ka NEHUTA ban thoh ïa ka kaiphod kaba bniah halor ka jingpynkheiñ ïa ka aiñ ka NEHU, ki ‘Statute’ bad ‘Ordinance’ da u VC sha ka President ka India, kaba dei ruh ka nongwan jngoh jong ka skulbah, ophis u Myntri Rangbahduh ka ri, Myntri ka tnad pule-puthi ka Sorkar Pdeng, u Dharmendra Pradhan, Myntri ka tnad pla tyngka ka Sorkar Pdeng, ka Nirmala Sitharaman, Lat ka Jylla, u Phagu Chauhan, uba dei u Chief Rector ka skulbah, Myntri Rangbah ka Jylla, Conrad K. Sangma bad kiwei-kiwei,” la ong ka kyrwoh na ki nongïalam.
Nalor kane, ka jingïalang ka la rai ba lada u VC um weng ïa katei ka shithi hapoh 5 sngi (ka ban sdang naduh ka 26 tarik mynta u bnai), ka NEHUTA kan ym ïashim bynta ha baroh ki jingïalang jong ka AC hadien habud.
