“Dei ka seng KSA kaba pynshit ïa ki Karbi ban beh kthong ïa ki pulit Meghalaya”

Shillong, Nailar 27

U Waheh Shnong ka Lapangap, Bah Deimon Lyngdoh u la ong ba kito ki paidbah Karbi kiba beh ïa ki pulit na jylla Meghalaya ki dei kiba shah kynshoit ha ka Karbi Student Association kaba la jia ha ka 26 tarik mynta u bnai.

U Bah Deimon u la ong ba katba ki pulit Meghalaya ki dang leit sharud shnong ka Lapangap ban leit ïakynduh ïa ki pulit Assam kiba la ïoh jingtip ba ki wan shna ktem ha jaka jong ka shnong, hynrei ki paidbah kiba la rah lypa da ki jri siat sim ki la ap lypa bad beh ïa ki pulit kat haduh ba ki pulit ki la hap ban phet noh.

U la ïathuh ba hadien ba la ïohsngew ïa kata ka khubor ki paidbah ka shnong ruh ki la ïa mih. Hadien kata ki pulit Assam bad Meghalaya ki la pynlong ka jingïakren sngewthuh jingmut bad ki karbi ki la phet noh la ka jong.

Nalor nangta, u Bah Deimon u la pyntip ba ki pulit ki don kumba 15 ngut eiei kiba sah ha Lapangap, hynrei ha ka por ba ki leit peit ïa ki pulit Assam ki don tang khyndiat ngut. Kumta ki la hap ban mareh noh ïalade hadien ba la shah beh ha ki paidbah namar ki khlem pat ïoh bor ban siat.

U la pyntip ba ka jingmih kane ka jingïakajia ka dei namar ki Karbi ki wan ban pynjot ïa ki tynrai dieng ba la thung da ka shnong ha khlaw shnong ha ka 12 tarik u Naitung mynta u snem kiba la sha pynjor kumba 600 tynrai.

Nalor kata, u la ïathuh ruh ba ha ka 18 tarik Nailar ki Karbi kiba la wan kham bun ngut ki la pynjulor palat shi hajar tynrai dieng.

Ha kajuh ka por u la ong ba ka shnong kan nym ailad ïa ki Karbi ba kin wan kam ïa ka jaka jong ka shnong kaba la dei trai naduh hyndai hynthai.

U la pyntip hadien ka jingïakren ki pulit Meghalaya bad Assam mynta ka Sngi U Blei kam shym la don shuh kano-kano ka huri-hura.