Jowai, Nailar 27
Ka Khliehmuchut Sports Club bad ka Iawmulong Nartiang Sports Club ki la ïoh ban khur ïa ka jingjop ha ka jingïalehkai 2nd Division Football Tournament ba la pynïaid da ka West Jaiñtia District Sports Association (WJDSA).
Kane ka la wan hadien ba ka Khliehmuchut SC ka la lah ban pynliem noh ïa ka Pynthorlangtein Sports Club da 3-0 kol kaba la long ha madan Kiang Nangbah Stadium Jowai ha ka sngi Saitjaiñ.
Haba phai sha ka jingïalehkai, ïa ki kol jong ka Khliehmuchut la ïoh ban thep da u Arwanki Phadong ha ka minit ba 29, u Eliser Suiam ha ka minit ba 44 bad u Rangdajied Sayoo ha ka minit kaba 63.
Ha kawei pat ka jingïalehkai, ka Iawmulong Nartiang SC ka la lah ban pynliem noh ïa ka Panaliar Sports Club da 1-0 kol ha ka jingïakhun kaba itynnad bad kaba ïakhaid bha. Ïa ka kol jong ka Iawmulong Nartiang la ïoh ban thep da u Sambor Nongtdeh ha ka minit ba 27.
