Shillong, Nailar 27
Ka Tyrsad Area Sports Asoociation (TASA) ha ka 26 tarik Nailar 2023, ka la plie ïa ka pyrda jong ka samoi ïalehkai phutbol kaba kynthup naduh ka kyrdan ïakhun jong ka First, Second bad Third Division kaba la pynlong ha madan Sohjhursaw, Tyrsad.
Ha ka First Division ki kynhun kiba la ïoh ban ïashim bynta baroh ki long 12 tylli. Ha ka Second Division ki don haduh 10 tylli bad ha ka Third Division ka ban pynïakhun ha ka dur jong ka knockout ki don ym duna ïa ka 33 tylli ki kynhun.
U Kongsan ba la wan ban plie pyrda ïa kane ka lympung ïalehkai dei u Bah Dlipstar Rani uba dei u Principal jong ka Tyrsad Higer Secodary School, ha kaba la wan ban ïa sakhi lang da u Lyngdoh ka Hima Lyngiong, ki nongïalam jong ka HYC, KSU, FKJGP Tyrsad bad ki nongkitkam jong ka shnong.
Ïa ka Tyrsad Area Sports Association la seng ïa ka ha u snem 2007 bad ba ka la ïoh ïa ka jingithuh na ka Meghalaya Football Association ha u snem 2012, kaba naduh ka snem ba la seng ïa ka bad ithuh da ka MFA, kane ka Synjuk ka la lah ba kan ïai pynlong ïa kine ki lympung ïalehkai khlem sangeh haduh mynta.
Ha shwa ban sdang jong ka jingïalehkai, la ïoh ruh ïa ki jingkren na ki riew pawkhmat bad khamtam na u President ka TASA u Bah Phelenstar Rani, katba ïa ka jingïalang la pynïaid da u Bah RA Rangslang, uba dei u General Secretary jong ka TASA.
Ka jingïalehkai sdang ka la long hapdeng ka Umkseh Sports Club pyrshah ïa ka Nongspung ‘AYSC, SA, ha kaba ka jingïakhun kala kut noh ha ka jingïakhaid hadien ba ym shym la don satia kiba la lah ban pynkhih jar wat haduh ba kut jong ka jingïalehkai.
Ka song pisa khusnam ïa ki kynhun ba rah ïa ka nam lahduh ka ka First Division ka long T.31000/- bad kaba wan ba-ar T.16,000/-, ha ka Second Division ka long T.19000/- ïa kaba rah ïa ka nam lahduh bad T.10,000/- ïa kaba wan ba-ar bad ha ka Third Division ka long T.13000/- ïa kaba rah nam lahduh bad T.7000/- ïa ka kynhun kaba wan ba-ar.
