![Ai jinghikai ka Avenues ïa palat 700 ngut ki khynnah skul lyngba ka APEX Program avenue](https://unongsainhima.com/wp-content/uploads/2023/08/avenue.jpg)
Shillong, Nailar 28
Palat 700 ngut ki khynnah skul na ki skul bapher bapher jong ka West Jaiñtia Hills, West Khasi Hills, bad South Garo Hills ki la shim bynta ha ka APEX Program kaba dang shu pyllait paidbah da ka AVENUES, Shillong.
Ka jingpynlong ïa kane ka prokram ka long ruh shi bynta jong ka jingrakhe lyngkhuh snem kaba 20 jong ka AVENUES ha ka jingïaid lynti jong ka kum ka ‘Social Enterprise’ kaba ju ai jinghikai ïa ki khynnah samla ka jylla bad ka thaiñ Shatei Lam Mihngi. Ïa ka APEX Program la ïoh pynlong 5 sngi lynter naduh ka 21 tarik Nailar ha ki 5 tylli ki skul jong kine ki 3 distrik bad la ïoh pynkut ha ka 25 tarik Nailar.
Ïa kane ka prokram la pynlong da ka AVENUES ha ka Pioneers Secondary School bad United Baptist Secondary School ha Baghmara, South Garo Hills; Thomas Jones Secondary School bad Rev. JJM Nichols Roy Memorial Secondary School ha Nongstoiñ, West Khasi Hills; bad Adventist Higher Secondary School ha Khliehtyrshi, West Jaiñtia Hills.
Ka APEX ka long ka jingpyrshang kaba thymmai bad kham pher namar ka AVENUES ka la pynwandur ïa ka da kaba pyrshang bud ïa ka National Education Policy 2020 ban pynrung ïa ki jinghikai Saïan ban hikai ïa ki khynnah kumno ba kin pynproh ïa ka rukom pyrkhat pyrdaiñ bad ban long kiba mlien ban buh jingkylli bad ym tang ban shu pdiang ïa kaei kaba ki ïohsngew lane pule. Kaba kham pher shuh shuh ka long ba la pynrung ruh ïa ki khana tang bad khana puriskam (Folklore) ban hikai ïa ki khynnah samla kumno ba kin sarong ïa la ka jong ka kolshor, ban pynpaw ïa ki akor burom bad ban burom ïa kiwei pat ki kolshor. Ki jinghikai ba kongsan jong ka APEX ki kynthup ïa ki soft skills kum ki akor burom, ban buh bad kot ïa la ki thong, ban kren paidbah, ka jingïadei para briew, bad ka jingbha jingmiat ha baroh ki liang. Ïa kine ki jinghikai ka AVENUES ka khot ïa ki kita ki “Human Skills for the Future” lane kita ki jingnang jingtip jong ki briew na bynta ka lawei kum ka Communication (kumno ban ïa kren bad ïadei para briew), Scientific Thinking (ka rukom pyrkhat pyrdaiñ), bad ka Wellbeing (ka jingbha jingmiat).
U Benjamin Marak, Principal, Pioneers’ Secondary School, Baghmara, u la pynpaw ïa ka jingsngewnguh ba bynta ka AVENUES kaba la wanrah ïa kane ka prokram sha ka skul jong u. U la ong, “Ka ju dei ka jingangnud jong nga ban sam ka jinghikai kaba myntoi kyllum bad kaba pynkhreh ïa ki khynnah jong ngi ban long ki jingmyntoi na bynta ka longïing longsem, ka jylla bad ka ri baroh kawei. Ka long ruh ka jingthrang jong ngi ban ai ka jinghikai kaba bha tam ïa ki khynnah, kam pher la ki wan na kano kano ka jaka ruh.”
Ka Ribahun Kharjahrin, Class 9 na Rev. JJM Nichols Roy Memorial Secondary School, Nongstoiñ, ka la shim bynta ka kane ka prokram bad ka la ong, “Ha kine ki 5 sngi, nga la ïoh jingmyntoi shibun eh kumno ba ngan ïaid ngan ïeng, ban pynithuh ïalade bad pynpaw ïa ka akor burom. Nga lah ïoh jinghikai ruh lyngba ki activities bapher bapher kumno ban buh ïa ka thong ha ka jingim jong nga bad ban trei minot bad jop ïa kata ka thong.”
U Founder-CEO ka Avenues, Mark L Stone, u la don ryngkat ha ka prokram pynkut ha Baghmara bad u la ïoh batai shai ïa ka jingthmu jong ka APEX da kaba ong, “Ïa ka APEX prokram la pynwandur na 20 snem ka jingtrei jong ngi ha ka soft skills bad personal development hapdeng ki khynnah samla ka jylla, bad ka wanrah lang ïa ki jingnang jingtip lane ki skills kiba long kiba donkam eh ha ki sngi ki ïa kiba mynta. Da kaba pynrung ïa kine ki jait training sha ki jaka ba kham kyndong ruh lyngba ki trainers jong ngi kiba lah ban hikai ha ki ktien bapher bapher, kynthup ïa ka Garo, Khasi, Pnar, bad Phareng, ngi ngeit ba kine ki jingpyrshang jong ngi kin long ki jingïarap bad jingkyrshan ïa ki jingpyrshang jong ka sorkar. Ka APEX model ka ïarap ïa ki khynnah ba kin long kiba shlur, kiba sngewtynnad bad burom ïa ka sobjek Saïan, kiba don ki jingmlien kiba bha bad ba tei ïa ka jingim jong ki, bad kiba sarong ïa la ka jong ka tynrai. Ngi rai ban pynmih ïa ka report kaba jylliew na kane ka jingpyrshang ba thymmai jong ngi bad ban pynjanai shuh shuh ïa ka model ban ïahap bad ki skul ki kolej baroh, ha kano kano ka distrik.”