Mariang, Nailar 28
Ka Hynñiewtrep Youths’ Council (HYC) Northwest ha ka Lah Sngi U Blei ka la leit ban ai da ka jingthoh sha ki katto katne ki nongkhaïi bad ki nongdie dewbilat kiba don hapoh ka Eastern West Khasi Hills distrik ba kim dei ban die ïa ka dewbilat TOPCEM kaba shna ha East Jaiñtia Hills.
Ki nongkitkam ka HYC ki la ong ba katei ka jingleit ai jingthoh ka seng ka dei kum ka dak ban ‘Boycott’ noh shi syndon ïa ka kompani ba shna ïa ka dewbilat TOPCEM lada ka wan bad rung hapoh Eastern West Khasi Hills namar ka jingphah bad kynshoit jong ki nongtrei jong ka kompani ïa ki pulit ban bom ban tied ïa ki paidbah ha ka 24 tarik Nailar ha Thangskai ha ka sngi ba la don ka jingpynsngew paidbah halor ki jingthmu jong kane ka kompani ban pynïar ïa ka rukom pynmih dewbilat jong ka.
