Shillong, Nailar 28
Ka shlem treikam jong ka Deputy Commissioner, East Khasi Hills ha ryngkat ka shlem u District Sports Officer, ka la pynkut noh ïa ka Inter Office Basketball, Mawpoiñ & Tan Tyllai Tournament ha ka lah sngi U Blei ha madan ïalehkai Basketball kaba ha J.N Stadium Complex, Polo.
Ha kane ka sngi la ïadon lang ka Deputy Commissioner Kong R.M Kurbah, (IAS) kum ka kongsan ha kaba la ïadon lang ruh u Bah S.Nongtnger, (IPS), Superintendent of Police ka East Khasi Hills, Bah Vivek Syiem (IPS), SP City, East Khasi Hills, Bah Wanshan Kharkrang, Sr Environmentalist Engineer ka Meghalaya State Pollution Control Board, ka Kumari Anandya Raajshree (IAS), Kong D.Kharshiing (MCS), ADC ka East Khasi Hills bad u Amin Kharkongor, uba la khur takma hapoh ka ri ha ka jingïalehkai Athletics.
Kumba ka paw ia ka Inter Office Basketball la ju pynlong la bun snem, hynrei ka jingïalehkai tan tyllai bad mawpoiñ la pynlong ha ka sien kaba nyngkong eh kaba long shi bynta ban rakhe ïa ka National Sports Day 2023 ha kaba la ïashim bynta da kiwei ki tnat treikam jong ka Sorkar Jylla.
Ha kane ka sngi la sam ruh sha baroh ki nongjop kiba la ïashim bynta ha kane ka lympung kaba la sdang naduh 24 tarik mynta u bnai.
