![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Nailar 28
Ka Meghalaya College Teachers’ Association (MCTA) ka la ong ba ki samla pule ki shah ‘blackmail’ lyngba ka National Education Policy (NEP) kaba la tyrwa sha ki.
“Ha kane ka shi bnai, ngi la shu peit jar-jar…ïa ki jingshisha halor kumno ban pynsngew ïa ka bad kumno la ïalam bakla,” la ong ka President ka MCTA, Dr. B.H. Buam ha ka jingïakynduh bad ki lad pathai khubor ha ka Lah Sngi U Blei.
Ka la ong ruh ba kum ka seng, ka la shah peit khmat, hynrei ka la sngap beit jar halor ka jinglong-jingman haba phai sha ka bynta ba ïadei bad ka NEP-2020.
Haba kdew ba wat hapdeng kiba bun ki jingkynthoh, ka seng kam shym la shah jem, ka Dr. Buam ka la ong, “Lada jia ba ngi shah jem, ha ka taïew ba nyngkong haba ngi la pynbna, kata baroh ngi la pyndem namar ka jingpynbor, hynrei hangne ngi ïatylli lang kawei kum ki dkhot jong ka seng.”
Ka la ong ruh ba kum ki nonghikai ki don ka nongrim, ba ki hap ban ai ka jingshakri kum ki nongtei ïa ka ri sha ka imlang-sahlang bad ka ri baroh kawei.
Haba pynsngew ba ka seng ka kwah ban weng ïa ki jingkhuslai jingmut jong ki kmie ki kpa, samla pule bad u paidbah ba bun balang, ka President ka la ong ba ka jingpyntreikam ïa ka NEP-2020 la leh khlem da pyrkhat bad ka jingbym shai.
“Ka skulbah (NEHU) kam shym la khot ïa ngi hynrei katba nang ïaid ki por, ngi ïohsngew ïa ki jingsawa – kiba kdew ba hooid ka MCTA ka ïeng na bynta ka hok bad ka jingshisha bad halor kaei kaba dei,” ka la ong.
“Ngi pyrshah jur ïa ka rai ban pyntreikam khlem ka jingmynjur lang jong kiwei da ka skulbah bad u Vice-Chancellor (VC),” la ong ka Dr. Buam da kaba bynrap ba ka MCTA kam pyrshah ïa ka NEP-2020, hynrei ka jingpyrshah ka long namar ka jingkyrkieh, ka jingbym kheiñ snep bad ka jingpyndonkam bakla ïa ka bor da u VC.
Ka la ong ruh ba ka jingdawa jong ka seng ka la ïoh jingkyrshan na ka NEHUTA (hapoh ka jingïalam u President, Prof. Lakhon Kma) kaba la shim ïa ka rai ba dei ban weng noh shi syndon ïa ka shithi kaba la phah da u Officer on Special Duty (OSD), u Debashih Chowdhury sha ki Principal jong ki kolej kiba pynïasoh bad ka skulbah ban ïaid shakhmat bad ka jingpyntreikam ïa ka NEP lyngba ka ‘Four-Year Undergraduate Programme’ (FYUP) naduh ka jingsdang jong ka samoi pule 2023-24.
Ha kawei ka liang, ka seng ka la buh jingkylli ruh ba lada u Myntri Rangbah ka Jylla, u Conrad K. Sangma u la ban jur ba ki jingpynsngew jong ka MCTA ki long kiba shongnia, balei pat ka shim por ban sdang ïa ka kam ban pynkhreh ïa ki nonghikai na bynta ka NEP.
“Nga kynmaw ïa ka jingong, ‘ym don shuh da kawei kaba kham ma ban ïa ka jingbym biang ki lad jingpynkhreh’. Ngi leit sha klas bad ngim pynkhreh, yn jia aïu ha klas, ka kynrum-kynram, ka huri-hura kan wan,” ka la ong.
“Hangne, ngi don ïa ka thong kaba jngai, ka thong ban pynwandur ïa ka lawei jong ka ri bad la pynwandur ha kamra klas. Ko ki samla pule baieid, pyrkhat bha ïa kane, kylli na kito kiba tip shaphang ka NEP namar ka NEP kaba la tyrwa sha phi, ko ki samla pule baieid, phi la shah ‘blackmail’…ngam banse ban pyndonkam ïa kane ka kyntien,” la ong ka Dr. Buam.
Ka la pynsngew ruh sha ki kmie ki kpa, samla pule bad u paidbah ba bun balang ba ka MCTA ka ïeng ha ka rynsan ha kaba ka ïakhun ïa kaei kaba dei hok bad ba shong nongrim bad na bynta ka lawei ba phyrnai jong ki samla pule.
“Ngim tip aïu kan jia ïa ka lawei jong ki ha kum kane ka por ha kaba ka NEP ka long tang ka song kaba rit eh ïa mynta. Ki kolej kim long kiba la khreh, ka Sorkar Jylla kam long kaba la khreh bad katta ki ong ba ngi la long kiba la khreh,” la ong katei ka khlieh nongïalam ka MCTA.
Shuh shuh ha ha kane ka sngi, na ka liang u General Secretary ka seng, Dr. A.W. Rani u la pynsngew halor kiei kiba la jia baroh haba ïadei bad ka NEP, naduh ka 30 tarik Naiwieng, 2021 ha kaba pynlong ïa ka jingïalang ha St. Anthony’s College ha kaba la rai ba lada pyntreikam ïa ka NEP hapoh ka Jylla, kata dei ban pynlong ïa ka MCTA kum ka kynhun ba kongsan ka ban ïadon bynta ha kane ka kam haduh ban da pynlong ïa ka jingïakhih Non-Cooperation Movement (NCM) kaba la sdang ha ka 1 tarik u Nailar, 2023.
Ka seng haba ban jur halor ka jingdawa ban phah weng mardor ïa ka shithi ba la pynmih ha ka 12 tarik Naitung, 2023, ka la ong ba shen kan sa shong jingïalang bad shim ïa ka rai haba ïadei bad ki sienjam nangne shakhmat.