Imphal, Nailar:
Ki runar ki bym shym la lah ban ithuh ki la thang ïa san tylli ki ïing kiba don ha ka shnong New Lambulane ha Imphal jong ka jylla Manipur ha ka por shiteng sngi jong ka sngi U Blei, la ïathuh ki pulit.
Ha kaba ïadei bad kane ka jingjia, u heh pulit u la ong ba mar ïa ïoh jingtip halor ka jingjia, la phah mar mar ïa ki kali pynlip ding sha katei ka jaka bad la lah ban pyllip ïa ka ding hashwa ba kan pur sted ha katei ka thaiñ.
Ym slem hadien ba la jia ka jingjia, ka kynhun jong ki briew ka la ïalum ban pynpaw ka jingpyrshah jur halor ka jingjia bad pynrem jur ïa ki heh ba dei khmih ba kim shym la lah ban ithuh ne thwet ïa ki runar kiba la donkti ha ka jingjia.
Ki shipai pahara ki la siat da kumba katto katne tylli ki tyndong lyer pynsat khmat khnang ban pynsaphret ïa ki nongïakhih pyrshah.
Ha kawei pat ka jingjia, kumba la ïathuh ki nongthoh khubor, la ong ba ki runar ki bym shym la lah ban ithuh ki la knieh ïa ki tiar siat na ki shipai pahara kiba la shah pyntreikam ha ka jaka sah jong u Director barim jong ka tnat ka koit ka khiah u K. Rajo ha ka sngi U Blei ha Sagolband Bijoy Govinda ha Imphal West distrik.
Ki tiar siat kiba la shah lute ki kynthup ïa ar tylli ki suloi AK bad ka Carbine. Ki pulit ki la pynlong ïa ka jingleit wad bad jingthwet ïa ki runar khnang ban ïohkem ïa ki bad ban ïoh biang ïa ki tiar siat ba la shah knieh.
