Shillong, Nailar 28
U Roberto Mancini u la shimti kum u coach ba thymmai jong ka Saudi Arabia ha ka jingsiew kaba palat $25 million ha ka shi snem hadien ki kynrum kynram kiba la mih ha ka por ba u dang shimti ïa ka Italy dangshen mynta u bnai.
Ka Saudis, kaba la jop ia ka lahduh ka Argentina ha ka jingialehkai ‘group’ jong ka World Cup ha Qatar, ka la long khlem u coach naduh ka jingmih noh u Herve Renard ban shimti noh kum u coach ia ka kynhun ki ‘the ialehkai ka France.
Ki khubor ki ïathuh ba u Mancini u la mih mynta ka sngi U Blei ban leit ïashim bynta ha la prokram ban pynithuh ïalade. La ong ruh ba un soi ïa ka kontrak ka ban kut haduh u snem 2027 ha ka jingsiew kaba €25m (£21.5m) hadien ba la dep ot ïa ka khajna bad un shimti ban pynïaid ïa katei ka kynhun ha ka 8 tarik u Nailur pyrshah ïa ka Costa Rica.
U coach barim ka Napoli u Luciano Spalletti u la mih bujli ha ka jaka u Mancini ban long kum u coach ba thymmai ka Italy ha ka taiew ba la la lah. U Mancini u la ïoh noh ïa katei ka kam ha ka 13 tarik u Nailar ha kaba u la pynkut noh ïa ki san snem kiba u la shimti ban pynïaid ia katei ka kynhun ïalehkai ha kaba u la lah ban pynlong ban khur ïa ka nam lahduh ha ka European Championship hadien ba ka la lah ban pynliem noh ïa ka England lyngba ka tie-breaker ha ka final, hynrei ka la duh pat ïa ka lad ban rung sha ka World Cup 2022 kaba la long ha Qatar.
Ha kawei pat ka liang, u Herve Renard na France ula ïehnoh ïa ka kynhun ïalehkai na Saudi Arabia ha u Lber. Te kumta kane ka kynhun ka la khmih lynti ban khur ïa ka jingjop kaba saw ha ka Asian Cup ka ban long ha Qatar ha u sem ban wan.
“Ka long ka burom kaba khraw ba ngan shah tyrwa ban shimti ïa kane ka kam kum u coach ka Saudi Arabia,” la ong u Mancini uba la dep ban soi ïa ka kontrak kaba saw snem.
“Nga sngew ba kane ka long ka kabu ksiar ïa nga ba ngan shimti ban pynïaid ïa ka kynhun ïalehkai jong kawei pat ka ri, khamtam ban kyntiew ïa ka phutbol ha Asia.”
Kumba ka paw kane ka ri ka la pynlut khambun ka spah ka phew na ka bynta ka lympung ïalehkai phutbol. Ka Saudi Public Investment Fund (PIF) dangshen ka la pynbna ba la bteng ïa ka jingpynlut pisa ki klob kum ka Al-Ittihad, Al-Ahli, Al-Nassr bad ka Al-Hilal na ka bynta ban wanrah ïa ki khlur ïalehkai ba kynsai ka pyrthei.
Ha ka por ba u dangshimti ban pynïaid ia ki klob, u Mancini ba la 58 snem ka rta, u la long teng kum u manager ka Manchester City hapdeng u snem 2009 bad 2013, ha kaba u la lah ban pynurlong ïa katei ka klob ban rah ïa ka Premier League kaba nyngkong eh ha u 2012.
