Jowai, Nailar 29
Ka Madankynsaw Mookyndeng ka la long ka lahduh jong ka lympung ïalehkai 3rd Division Football Tournament na ka bynta ka 3rd Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka lah ban pynliem noh ïa ka Mukhla Umlangshor da 3-0 kol ha ka jingïakhun phainal kaba la long ha Kiang Nangbah Stadium Ladthad -laboh, Jowai haka sngi Ba-ar.
U Iomaiki Lamare u la long u nam tam hadien ba ula khyrwit ar kol ha ka minit kaba 47′ & 52 bad sa shikol la ïarap thep da u Cherishson Tyngkan ha ka minit kaba 80’+3. Da kine ki lai kol ka la biang pura ïa ka Madankynsaw ban kan khur ïa ka nam jop bad rah syndon ïa ka nam lahduh jong kane ka aïom ïalehkai.
Hadien ka jingïakhun la sam ïa ka khusnam ‘Man of the Match’ sha u Ioomaiki Lamare, ka nam ‘Best Goalkeeper’ ka leit sha u Wansame Saioo (Madankynsaw), Top Scorer sha u Precious Tang u rangïalehkai ka Madanthad Thadmuthlong uba la thep 14 kol, katba ka nam ‘Player of the Tournament’ la ïoh khur da u Dangri Phawa jong ka Madankynsaw Mowkyndeng.
Ïa ki khusnam sha ka lahduh bad lahduh ba ar la sam da kiba haïing u (L) Adelbert Laloo kynthup ïa u khun u Bah EMH Passah uba dei u Working President ka WJDSA ha ka jingïadonlang ki nongïalam bad ki dkhot ka WJDSA kiba kynthup ïa u Bah Lammat-O-Laloo, Bah Patrick Lamare, Nangaibor Suting bad kiwei kiwei.
