Shillong, Nailar 29
Ka tnat ïalehkai ka Sorkar Jylla ka la pynkup burom haduh 209 ngut ki nongïalehkai kiba la wanrah burom ha ki jingïa-lehkai bapher bapher na ka bynta u snem 2022-23.
Ïa kane ka jingpynkup burom la pynlong ha ka jingrakhe ïa ka National Sports Day kaba la long ha ka sngi Ba-ar ha madan Basketball JN Sports Complex, Polo.
Na kitei ki 209 ngut kiba la shah pynkup burom, 135 ngut ki nongïalehkai kiba hap hapoh ka Olympic Discipline bad 74 ngut kiba hap hapoh ka Non- Olympic Discipline.
Kitei ki 135 ngut ki kynthup ïa ka Archery iwei, Boxing (18 ngut), nangta ha ka phutbol la pynkup burom ïa ka kynhun kaba rah ïa ka nam lahduh ha ka National School Games (18 ngut), karate (84 ngut), Judo (10 ngut), sports climbing & mountaineering (4 ngut).
Haba phai pat sha ka Non-Olympic Discipline ki kynthup ïa ka Wushu (4 ngut), arm wrestling (7 ngut), Muay Thai (37 ngut), Jeet Kune Do (30 ngut).
Ha kane ka sngi la ïadon lang u Myntri ba dei khmih ïa ka tnat ïalehkai u Bah Shakliar Warjri kum u kongsan, ryngkat ka nongaiktien kaba dei artad ka Myntri jong ka Sorkar Jylla ka Dr. M. Ampareen Lyngdoh, ka Director ka tnat ïalehkai ka Kong Isawanda Laloo (IAS), u Bah Methdious Dkhar, MLA Mawshynrut Cons-tituency, u Working President ka Meghalaya State Olympic Associa-tion u Bah John F. Khar-shiing, ki ohisar jong ka NYK, ki president, ki secretary jong ki synjuk ïalehkai lem bad ki kmie ki kpa jong ki khynnah ïalehkai.
Haba ai jingkren ha katei ka sngi, u Bah Shakliar u la kyntu bad ai mynsiem ïa ki khun samla ba kin shim khia ïalade ha ka ban pyntbit ha ki kam ïalehkai bad u la ong ruh ba ka sorkar jylla ka la wan shakhmat ba kan pyrshang ban ai ïa kaba bha tam na ka bynta khun samla kiba don ïa ki sap ïalehkai ba nylla.
