Shillong, Nailar 29
U nongaibuit sha ka tnad pule-puthi ka Sorkar Jylla, Bah H.M. Shangpliang ha ka Sngi Ba-ar u la ong ba ka Meghalaya State Education Commission (MSEC) kan sa khmih bniah ïa ka mat halor ka jingpynskhem kam ïa ki nonghikai SSA hapoh ka Jylla.
“Nga tharai phi tip ba ka Sorkar ka la thaw ïa ka MSEC bad ïa kane ka mat (pynskhem kam) yn phah sha ka Commission. Ka Commission kan sa khmih bniah ïa kane bad ngi khmih lynti ba kan ai ki jingai jingmut sha ka Sorkar Jylla,” la ong u Bah Shangpliang haba kren ha ka jingïalang bad jingpynkup burom ïa ka Sorkar Jylla da ka MSSASA kaba la long ha U Soso Tham Auditorium.
U la ong ruh ba nalor ka jingpynskhem kam, ka Commission kan sa khmih ruh ïa ka mat halor ka jingpynkiew tulop jong ki nonghikai.
Halor ka jingkhuslai jingmut jong kiba bun ki nonghikai SSA ba ka skhim kan sa kut noh hadien u snem 2026, u nongaibuit u la pynshai ba kan ym long satia kumta.
“Ngan pynshai sha phi…wat ngeit ïa kane ka jingong ba hadien ka 2026, kaei ka lawei jong ki nonghikai. Kam dei kumta…ka Sorkar India ka la buh ïa ka thong na bynta jong phi bad ïa ngi kumjuh. La ai sha ngi ïa katto-katne ki thong bad ïa kine dei ban pynurlong hapoh u snem 2026 bad haba kut jong u 2026, yn sa khmih bniah ïa ka SSA ha ka Jylla da ka Sorkar India,” u la ong.
U la kdew ruh ba ka Sorkar India kan sa peit katno la kynjoh bad kiei ki bynta ki bym pat lah pynurlong bad hadien kane, kan sa buh da kiwei pat ki thong bathymmai bad kata ka lah ban dei nangne hadien 10 snem – ka lah ban dei ha u snem 2036 ne 2046 bad kumta yn buh ïa ki thong iwei hadien iwei.
“Weng ïa kane ka jingngeit na ka jingmut-jingpyrkhat jong phi,” la ong u Bah Shangpliang.
Ha kawei ka liang, u la ong ba ka Sorkar hapoh ka jinglamkhmat u Conrad K. Sangma ka don beit ha syndah bad ki nonghikai SSA bad ka minot ha ka ban shimkhia ïa ki jingeh ba ki nonghikai ki ïakynduh.
“Ka MDA-I ka la pyrshang ban leh shibun kiei-kiei bad ka la lah ban pynbeit ïa kiba bun na ki jingeh jong phi. Mynta ka MDA-II ka la leh kham bun shah, tang hapoh 6 bnai, ka Sorkar ka la lah ban shimkhia jan baroh ki mat jingdawa jong phi,” u la ong.
Na ka liang jong u, u la pynsngew ruh ba ka tnad ka la shimkhia ha ka ban pyntikna ban siew noh ïa ka tulop jong ki nonghikai ha man la ka 3 bnai nangne shakhmat.
“Ka 1st ‘Instalment’ na ka Sorkar India yn sa pyllait sha ka Sorkar ha u bnai Nailur…kane ka dei namarba shi bnai mynshuwa, haba u Myntri ka tnad pule-puthi u la don ha Delhi ha kaba nga ruh nga la synran lang ïa u, ngi la ïakynduh ïa ki katto-katne ki heh ophisar jong ka tnad treikam ka Sorkar Pdeng ba peit ïa ka SSA. Ki la kular ba nangne shakhmat, ki kam kin ïaid beit bad katba ngi dang pynbiang ïa ki ‘Utilization Certificate’ (UC) bad bud ïa ki kyndon ba la buh da ka Sorkar India, ka jingwan jong ka pisa kan ym sangeh na bynta jong phi,” u la ong da kaba bynrap ba ka jingsahkut pisa kan ym jia shuh nangne shakhmat bad ba ka 2nd Instalment kaba dei ban pyllait ha u Nohprah – ka kam ka la ïaid bad ka pisa kan sa sdang poi sha ki ‘Account’ jong ki nonghikai.
Shuh shuh haba pynsngew ba ka tnad kan dang hap pynbiang ïa ka ‘Capping Salary’ kaba kot sha ka T.52 klur, u Bah Shangpliang u la pynbna ba ka kam halor kane ka bynta ka la ïaid shakhmat.
Ka Sorkar shen kan sa pynbha noh ïa ki ïingmala jong ki skul SSA ha kylleng ka Jylla, u la ong.
