Shillong, Nailar 30
U khlur nongkawang sum jong ka ri, u Neeraj Chopra u la khmih lynti ban ïai bat kum u rangïalehkai uba khlem shah rem ha ka Diamond League ha kaba un ïashim bynta ha ka sngi Palei ha Zurich.
Ha ka sngi U Blei, u Chopra u la lah ban pynpaw ïa ka jingtbit ban khur ïa ka nam lahduh ha ka World Championships kaba la long ha Budapest ha kaba u la lah ban kawang 88.17m. U la khur ïa ka takma rupa ha u snem 2022.
Une u khlur ïalehkai ka ri u la long u nongkawang sum uba lai ban thaw ïa ka khana na ka bynta ban khur ïa ka jingjop ha ka Olympic bad kumjuh ha ka World Championships hadien ka rekod ba la bat da u Jan Zelezny na Czech Republic bad u Andreas Thorkildsen jong ka Norway.
U Zelezny u la khur ïa ka takma ksiar ha ka Olympics jong u snem 1992, 1996 bad 2000, katba u la khur jingjop lai sien ha ka World Championships ha u snem 1993, 1995 bad 2001. Katba u Thorkildsen u la khur ïa ka takma ksiar ha ka Olympics 2008 bad ruh ha ka World Championships 2009.
Kumba ka paw u Chopra ba dang 25 snem ka rta u la long u rangïalehkai u bym pat shah rem ha kane ka aïom, ha kaba u la jop ar sien ha ka Diamond League kaba la long ha Doha (5 tarik u Jymmang) bad ha Lausanne (30 tarik u Jylliew) hashwa ba un khur ïa ka jingjop ha ka World Championships.
Ha Zurich, u Chopra un ïakhun pyrshah ïa ki nongïalehkai kum u Jakub Vadlejch na Czech Republic, u Julian Weber na Germany bad u Anderson Peters na Grenada.
