New Delhi, Nailar 30
Ka Sorkar Pdeng ka la ïoh jingtip ba ha kiba bun ki jingjia namar ki jingïai pynkylla ïa ka ‘Bank Account Number’ da uba dei ban ïoh jingmyntoi bad namar ka jingbym pynthymmai ïa u ‘account number’ bathymmai da u Programme Officer ba dei khmih ïa kane, namar ka jingbym ai ïa u ‘account’ bathymmai ha ka por da uba dei ban ïoh jingmyntoi, bun ki jingsiew ïa ka bai bylla la kyntait (namar u ‘account number’ barim) da ka Bank Branch ba don ha ka jaka ba ki trei.
Ha ka jingïakren bad kiba don bynta ha kane ka kam, la lap ban lait na kum kine ki jingshah kyntait, ka Aadhaar Payments Bridge System (APBS) ka dei ka lad kaba biang tam ban ai jingsiew bai bylla lyngba ka Direct Benefit Transfer (DBT). Kane kan ïarap ïa kiba dei ban ïoh jingmyntoi ba kin ïoh ïa ka jingsiew jong ki ha ka por.
Shisien ba la pynthymmai ïa u ‘Aadhaar’ ha ka ‘database’ jong ka skhim, uba dei ban ïoh jingmyntoi um donkam ban pynthymmai ïa ki ‘account number’ namar ka jingkylla ha ka jaka lane ka jingkylla ha u ‘bank account number’. Yn phah ïa ka pisa sha ka ‘account number’ kaba ïasoh bad u ‘Aadhaar’. Ha kaba ïadei pat bad ka jingdon palat kawei ka ‘account’ jong uba dei ban ïoh jingmyntoi, kaba kham ñiar ban lap ha ka MGNREGA, u nongïoh jingmyntoi u don ka lad ban jied ïa ka ‘account’.
Ka ‘data’ jong ka National Payments Corporation of India (NPCI) ka pyni ba ka don ka jingjop kaba khraw ha ka ‘percentage’ kaba kot haduh 99.55% shaneng ha kaba u ‘Aadhaar’ u ïarap na ka bynta ka DBT. Ha kaba ïadei bad ka jingsiew katkum ka ‘Account’ ka jingjop ka long kumba 98%.
Ka APBS ka ïarap ïa ki nongïoh jingmyntoi kiba dei ban ïoh ïa ka jingsiew jong ki bad ka ïarap ban tehlakam ïa ka jingbamsap da kaba weng ïa ki nongïoh jingmyntoi kiba shu thok.
Ka Mahatma Gandhi NREGS kam pat pdiang ïa ka jingsiew ba pyntreikam ïa u ‘Aadhaar’. La peit bniah ïa ka jingïaid shaphrang ka APBS bad la pynjlan ïa ka rukom siew lang ïa ka bai bylla (NACH bad ABPS) haduh ka 31 tarik, Nohprah 2023 lane haduh da pynbna da kumwei pat.
Ka tnad ka la pynshai sha baroh ki Jylla ba u nongïoh jingmyntoi uba wan ban trei u dei ban ïoh ïa u ‘Aadhaar’ hynrei um dei pat ban shah kyntait ban trei halor kane ka nongrim. Lada u nongïoh jingmyntoi um dawa ïa ka kam, ha kum kane ka jingjia u/ka ba dei ban ïoh ïa ka APBS kam ktah ïa ka jingdawa kam. Ym lah ban pyndam ïa ki ‘Job Card’ halor ka nongrim ba ka daw ba u nongtrei um biang na ka bynta ka APBS.
Hapoh ka Mahatma Gandhi NREGS, ka APBS ka la treikam naduh u snem 2017. Hadien ba baroh ki don ïa u ‘Aadhaar’, mynta ka Sorkar India ka rai ban bteng ïa ka APBS na ka bynta kiba dei ban ïoh jingmyntoi hapoh ka skhim.
Ka jingsiew kan long tang lyngba ka APBS sha ka ‘account’ ba ïasoh bad ka APBS, kaba mut ba ka long ka rukom siew pisa kaba kham shngaiñ bad kaba kham sted.
Na ka 14.33 klur ki nongïoh jingmyntoi, la pynïasoh Aadhaar ïa 13.97 klur. Na kine kiba la pynïasoh Aadhaar, 13.34 klur ki Aadhaar ki dei kiba la pynshisha bad 81.89% ki nongtrei mynta ki don hok ban ïoh PBS. Ha u bnai Naitung 2023, la siew bai bylla kumba 88.51% lyngba ka APBS.
Ka Mahatma Gandhi NREGA ka dei ka skhim kaba ïaid katkum ka jingdonkam bad ka shong ha ki kam bapher-bapher ba ïadei bad ka ïoh ka kot. Haba pyrkhat ïa ki jingmyntoi jong ka APBS na ka bynta kiba dei ban ïoh jingmyntoi, kane ka long ka lad kaba biang tam ban bud na ka bynta ka jingsiew.
Ka rukom siew katkum u Aadhaar kam dei kaei-kaei hynrei ka lad ban rung ka pisa sha ka ‘account’ jong kiba dei ban ïoh jingmyntoi. Ki don ki sienjam ba biang ba la pdiang ha kane ka rukom treikam bad ka bynta jong kiba dei ban ïoh jingmyntoi, ki nongtrei bad baroh kiba don bynta ha kane ka kam ki dei kiba la kdew shai.
