Libreville, Nailar:
Katkum ki khubor la ong ba katto katne ki heh nongialam ka kynhun shipai jong ka ri Gabon, ki la mih paw ha ki TV ha ka Sngi Balang ha kaba ki la pynbna ba la weng noh ia ka ilekshon kaba dei ban long shen ha kine ki sngi namar ba katei ka kynhun shipai ka la rai ban synshar hi noh ia ka ri da ka bor.
Ha katei ka por ba la pynbna ia katei ka khubor, ki lad pathai khubor ki iathuh ba ka don ruh ka jingriew ki suloi hapoh ka nongbah Libreville ba la siat shalor suiñ kum ka dak ban pynsawa bad pynbna ia ka jingjop jong katei ka tnat shipai ha katei ka ri.
Kumta, la ong ba ia ka ilekshon kaba dei ban long ha une u snem, la pynsangeh bad weng noh shi syndon bad baroh ki tnat treikam jong ka sorkar naduh ka Senate, ka National Assembly bad wat ki Constitutional Court ruh kin sangeh treikam noh bad yn pynduh bor noh ia kita baroh.
Ha kajuh ka por ruh, la pynbna ba la khang noh shwa ia ki khyrdop khappud jong ka ri baroh kawei tad haduh ban da pynmih da kawei pat ka jingpynbna ba yn plie biang noh.
Napdeng ki dkhot jong katei ka kynhun shipai, ki don kiba dei ki dkhot jong ka Republican Guard bad kumjuh ruh ki shipai jong ka tnat shipai ka ri, ha ryngkat ruh bad ki heh pulit na kylleng ki bynta jong ka Gabon.
