Shillong, Nailar 30
U rangïalehkai phutbol ka Jylla u Aibanbha Dohling u la pynïasoh sha ka Kerala Blasters na ka bynta ka aïom ïalehkai Indian Super League.
Une u rangïalehkai barim ka FC Goa uba la san na ka shlem treikam jong ka Tata Football Academy u la soi ïa ka kontrak kaba lai snem bad kane ka klob ka ban kut haduh u snem 2026.
Ïa kane ka pynthikna da katei ka klob ISL ha kaba kam shym la pynpaw ha kaba ïadei bad ka jingsiew na ka bynta utei u rangïalehkai ‘dien barim ka Shillong Lajong FC.
Kumba ka long mynta u Aiban u la long u rangïalehkai uba la ju mlien ha ki lympung ïalehkai hapoh ri India. Ha u 2016 u la pynïasoh sha ka Shillong Lajong na ka bynta ka lympung ïalehkai I-League bad u la pynlut ïa ka por ïalehkai haduh lai snem. Lyngba ka jinglah ban pynpaw ïa ka jingtbit kum u rangïalehkai ‘dien, u Aiban ha u 2019 u la pynïasoh sha ka FC Goa na ka bynta ka lympung ïalehkai ISL.
Hadien ba u ïasoh sha katei ka klob na Goa, u Aiban u la ïoh ban ïalehkai tang shisien ha ka Indian Super League (ISL) jong ka aïom ïalehkai 2019-20. Hynrei ha ka aïom ïalehkai 2020-21 bad 2021-22 u la ïoh ban ïalehkai tang katto ktne ki jingïakhun bad ïadon bynta ruh bad katei ka kynhun kaba la khur ïa ka nam lahduh ha ka Durand Cup 2021.
Hadien ba ka FC Goa kam shym la plie lad ïa u naduh u ka aïom ba la lah, u Aiban u la pyrshang ban ïasoh noh sha kiwei pat ki klob bad mynta ka kynti utei u rangïalehkai ba dang 27 snem ka rta u la lah ban pynïasoh sha ka kynhun jong u Ivan Vukomanovic na ka bynta ban pynkhlaiñ ha ka bynta kaba shadien hadien ka jingmih noh u kapten ka klob u Jessel Carneiro.
Kumba ka paw ka Kerala Blasters ka la wanrah ïa ki rangïalehkai ba thymmai hashwa ban sdang ka ISL 2023-24. Kine ki kynthup ïa u Prabir Das, Naocha Singh bad u Pritam Kotal, kumjuh ïa u rangïalehkai ‘dien na Montenegro u Milos Drincic.
Shuh shuh ka la wanrah ruh ïa kiwei pat ki rangïalehkai ban pynkhlaiñ ïa ka kynhun kum u Ishan Pandita, Lara Sharma (ba la shim wai na ka Bengaluru FC) bad u rangïalehkai shakhmat u Jaushua Sotirio na ka Newcastle Jets FC.
Ka Kerala Blasters ha kane ka kynti kaba mynta kam shym la lah ban ïalehkai bha ha ka Durand Cup ha kaba ka jingïaid lynti jong ka, ka la poi sha kaba kut tang ha ka jingïalehkai (group) ha kaba ka la jop tang shisien na ki saw sien ïakhun.
