Gangtok, Nailar:
U General Secretary jong ka seng Hamro Sikkim Party (HSP) ba la lamkhmat da u Bhaichung Bhutia u Biraj Adhikari, u la phah ïa ka shithi iehnohkam sha u President jong ka seng, ha kaba u la pyni daw ba um don ha ka met kaba koit bakhiah bad na ka liang ka seng ka la ong ba ka rai jong ka jingiehnohkam jong u ka long naba u suba ba kan sa don ka jingïapait hapoh ka seng.
Ha ka shithi kaba la phah ha ka 30 tarik, Nailar, 2023, u Adhikari u la pynpaw ba ka jingïakhun pyrshah ïa ka jingpang bampong da palat 10 bnai ba la leit ka la long ka daw jong ka jingiehnohkam jong u. U la ong ruh ba ki doktor jong u ki la ong ba un sa lait na kane ka jingpang ha ryngkat ka jingshah sumar tang hapoh ki ar snem ban wan, bad u la kwah ban shim shwa ïa ka rai ha kaba ïadei bad ki jingsumar ba u dei ban ïoh ha kum kane ka por.
Shuh shuh, u Adhikari u la ïoh jingtip ïa ka jingmut jong ka seng ha kaba ïadei bad ka rai jong u, ha kaba ka la ong ba na ka jingïohsngew ban don ka jingïapait u la rai ban iehnohkam. U Adhikari u la kyrpad ïa u President jong ka seng HSP ba un pdiang ïa ka shithi iehnohkam jong u na baroh ar, kata na ka shuki kum u General Secretary bad ka jinglong dkhot jong u hapoh ka seng kham kloi katba lah.
Ha kaba ïadei bad kane haduh ba la thoh ïa ka khubor na ka liang ka kynhun nongïalam jong ka seng kam pat phah kano kano ka shithi ban mynjur halor ka jingiehnohkam jong u Adhikari.
