Shillong, Nailar 31
Ka AS Roma ka la pyndep ban soi da kaba shu shim wai na ka bynta u Romelu Lukaku na ka Chelsea ha ka sngi Palei.
Kane ka jingleit ïasoh u Lukaku sha ka Roma ka la wan hadien ka jingleit ïalehkai (loan) ha ka aïom ïalehkai 2022-23 bad ka Inter Milan ha Italy. Une u rangïalehkai ba la 30 snem ka rta u la ïoh ban ïalehkai 17 sien bad 6 sien kum u rangïalehkai shongben. U la ïoh ban thep 9 kol na ki 39 sien ki jingpyrshang.
Ha ka por ba u Lukaku u la don ha ka Chelsea u la mad shibun ki jingeh. Hadien ba u la pynïasoh sha ka Chelsea ha u snem 2021 ha ka jingsiew kaba 97.5m hadien ba u la mih noh na ka Inter Milan, u Lukaku u la shem jingeh kumno ban pynïahap ialade bad kane ka klob jong u Thomas Tuchel.
Ka jingïadei ka jong u bad u Tuchel kam long kaba suk bad u la pynpaw ka jingbym hun haba u don ha ka Chelsea namar u la shah kynthoh ha ka klob bad ruh ki paidbah nongkyrshan.
Ka rukom ïalehkai ka jong u ka la sdang ban hiar bad u la ïoh ban thep tang 10 kol ha baroh ki lympung ïalehkai na katei ka klob.
Mynta kum u dkhot ka AS Roma, u Lukaku un pynkhreh ban ïatylli biang bad u coach u Jose Mourinho, uba la ïadon bynta lang kham hashwa ha ka Manchester United.
Haba pynpaw hapoh ka website jong ka klob, u Lukaku u la ong ba u dap da ka jingsngewkmen eh haba kane ka klob ka la pdiang sngewbha ïa u naduh ki nongkyrshan bad ka klob.
“Ka jingpdiang sngewbha na ka klob lem bad ki nongkyrshan ka pynkmen ïa ka mynsiem ka jong nga bad dei kane kaba pynlong ïa nga ba nga dei ban leh eiei na ka bynta ka klob kaba thymmai,” la ong u Lukaku na ka bynta ka sien kaba nyngkong kum u rangïalehkai ka Roma.
U Lukaku un phong ïa ka jersey No.90 na ka bynta ka Roma.
