Dimapur, Nailar:
Ka Health and Family Welfare Department jong ka Nagaland ka la pynlong ïa ka Modified Food Safety on Wheels (MFSWs) ka jingpyntreikam kaba da ki kali na ka bynta ka jingkhmih bniah ïa ki rukom long jong ki jingbam.
Ïa ki MFSW la pynlong hapoh ka jingtreikam jong ka Nagaland Food Safety Project Scheme ka “Strengthening of Food Safety Ecosystem in the State” ha Kohima ha ka sngi Balang. Da ka jingpyntreikam ïa ki ar tylli ki MFSW, ka jylla ka la don ïa kumba lai tylli ki Laboratory hapoh ki kali na ka bynta ban khmih bniah ïa ki rukom long jong ki jingbam hapoh ka jingtreikam jong ka Nagaland Food Safety Project, ïa kiba la mang na ka bynta ka Kohima, Mokokchung, bad ka Dimapur. Ïa ki ar tylli ki MFSW kiba thymmai la pyllait paidbah da u Principal Director cum Additional Food Safety Commissioner u Dr Vibeituonuo M Sachu.
U Food Safety Commissioner cum Commissioner and Secretary, Health and Family Welfare Department, u V. Kezo, uba la donlang ha kane ka sngi, u la ong ha ka jingai jingkren jong u ba ïa ki MFSW ym shym la pyndonkam tang na ka bynta ban khmih bniah halor ki jinglong jong ki jingbam hynrei na ka bynta ban khmih bniah ha kaba ïadei bad ka jingpynmlieh ban pynïoh ïa ki jingbam kiba shngaiñ ban bam bad ban buh ha ki jingmut jingpyrkhat jong ki briew ha kaba ïadei bad ka jingshna ne shet ïa ki jingbam kiba buh jingshngaiñ ïa ki briew.
U la kyntu ïa ki nongthied-nongpet ba ki la dei ban khmih bniah bha ïa ki rukom song hashwa ba kin thied ïa kino kino ki jait jingbam, kum ïa ki jingbuh tarik ha kaba ïadei bad ki rukom pyndonkam ïa ka jingbam bad ban khmih bniah ïa ki tarik ba pynmih ne ban kut ka por ba la buh na ka bynta ka jingbha ban bam ïa ki jingbam ba la shna bad thep ha ki song. Shuh shuh la ong ba la dei ruh ban khmih bniah ïa ki jait jingkhleh ba la khleh ha ki jait jingbam ne ki jingdih bad kumjuh ïa ka FSSAI Registration/License Number ha ki song hashwa ban thied ïa ki jingbam.
