Rah nam lahduh ka Assam, basaw ka Meghalaya ha ka North East Zone Shooting

Ka Meghalaya kaba la wan ha ka kyrdan ba saw, ka la khur 3 tylli ki takma ksiar, 6 tylli ki takma rupa bad 4 tylli ki takma rnong.

Shillong, Nailar 31

Ka kynhun ki nongsiat suloi na Assam ka la khur ïa ka nam lahduh ha ka 10th North East Zone Shooting Champion-ship 2023, katba ka Meghalaya ka la wan ha ka kyrdan basaw.

Ïa kane ka jingïakop kaba la sdang naduh 20 haduh 27 tarik u Nailar ha Precision Indoor Range jong ka Assam Regimental Centre, Happy Valley, Shillong, la pynïaid da ka Shooting Association of Meghalaya (SAM) ha ryngkat ka  jingïasnoh kti lang bad ka tnat ïalehkai ka Sorkar Jylla lem bad ka North Eastern Council. La pynïaid ïa kane ka jingïakop kat kum ka jingpriud dak da ka National Rifle Association Of India.

Ha katei ka jingïakop kaba la neh hynñiew sngi lynter, ka Assam ka la khur haduh 27 tylli ki takma ksiar, 13 tylli ki takma rupa bad 13 tylli ki takma  rnong. Ïa ka kyrdan ba-ar la bat da ka Mizoram ha kaba ka la khur 18 tylli ki takma ksiar, 10 tylli ki takma rupa bad 9 tylli ki takma rnong. Ïa ka kyrdan balai la ïoh da ka Assam Rifles Marksmen unit ha kaba ka la khur 12 tylli ki takma ksiar, 8 tylli ki takma rupa bad 9 tylli ki takma rnong.

Ka Meghalaya kaba la wan ha ka kyrdan ba saw, ka la khur 3 tylli ki takma ksiar, 6 tylli ki takma rupa bad 4 tylli ki takma rnong. Ka Manipur ka la khur 10 tylli ki takma rnong bad 7 tylli ki takma rnong. Ka Nagaland ka la khur 6 tylli ki takma rupa bad 3 tylli ki takma rnong. Katba ka Army Marksmen Unit (AMU) ka la khur 6 tylli ki takma ksiar, 4 tylli ki takma rupa bad kawei ka takma rnong.

Ïa ki khusnam sha ki nongjop la sam da u Bah Peter J.P Hanaman (IPS) Retd, uba long u dkhot ka Human Rights Commission, Shillong bd uba dei ruh u DGP barim ka Jylla, ha ryngkat ka jingïadon lang u Col.B.S. Rawat, Deputy Commandant ka Assam Regimental Center. Kiwei kiba la shah khot sngewbha kio long ka S.Lalthangzo IES, Economic Advisor jong ka NEC, u M.B. Tongper, ADC Ri Bhoi District, Kong l. Warjri Astt. Director ka Meghalaya Administrative Institute, Bah K.Blah, Co-Chairman ka Meghalaya Health Advisory Board, Bah P.B Warnongbri, Asst. Director (DSYA), Bah John F Kharshiing, President ka SAM bad Vice President ka NRAI, Bah K. Wariri, General Secretary ka All Meghalaya Karate Do Association bad kiwei.

Lah ban kdew ba kiba la wan ïashim bynta ha kane ka jingïakop ki don haduh 270 ngut kiba na ki jylla ka thaiñ shatei lammihngi kynthup lang ïa ka Services (Army Marksmen unit & Assam Rifles Marksmen unit).