Shillong, Nailar 31
U Raphael Varane un duh ïalehkai kumba kattto katne taiew ha kaba ka Manchester United ka la ïakynduh jingeh lyngba ka jingmynsaw jong une rangïalehkai hashwa ba kane ka kynhun kan leit ïakhun bad ka Arsenal na ka bynta ka Premier League.
Kane ka kynhun jong u Erik ten Hag kan leit sha North London na ka bynta ka jingïakhun ha ka sngi U Blei. Ha kane ka jingleit kan long khlem ki katto katne ki rangïalehkai kum u Luke Shaw bad u Mason Mount ki bym pat lah ban ïalehkai, katba u rangïalehkai ba dang shu soi thymmai u Rasmus Hojlund la khmih lynti ban un ïoh ïalehkai nyng-kong hadien ka jingmynsaw ha ki bynta jong ka met.
U Tyrell Malacia, Amad Diallo, Kobbie Mainoo bad u Tom Heaton ki la duh ïalehkai ha kaba sdang kane ka lympung bad mynta ka kynti sa u rangïalehkai ‘dien na France u Varane uba la ngat ha ka jingmynsaw.
“U Raphael Varane un duh ban leit lang bad ka kynhun ha kaba ka Manchester United kan ïakynduh pyrshah ïa ka Arsenal ha ka Premier League ka ban long ha ka sngi U Blei na ka daw ka jingmynsaw,” la pynpaw kane ka klob ha ka sngi Balang.
“Utei u rangïalehkai na France u la mih madan haka kylla miet ha kaba ka United ka la jop da 3-2 kol ïa ka Nottingham Forest ha Old Trafford ha ka sngi U Blei bad u la mynsaw ha kaba un hap ban sangeh ïalehkai kumba katto katne taiew.”
Utei u rangïalehkai ba dang 30 snem ka rta u la ngat ha kiba bun ki jingmynsaw naduh ba u la pynïasoh sha Old Trafford ha u 2021 bad u la pynbna ruh ban shongthait na ka kam ïalehkai jong ka France ha u Rymphang.
Kumba ka long mynta ka Manchester United ka la don ha ka kyrdan ba phra ha ka Premier League hadien ba la jop ar sien bad shah rem shisien na ki lai sien ïakhun.
