Shillong, Nailur 01
Ka Paris St Germain kan ïatynjuh bor ha ka Champions League pyrshah ïa ki kynhun jong ka Group-F kiba kynthup lang ïa ka Borussia Dortmund, AC Milan bad ka Newcastle United hadien ba la pynïakap ha ka sngi Palei.
Ka PSG, AC Milan bad Dortmund ki la ju ïakynduh teng ha kiba bun ki lympung ïalehkai ha Europe, hynrei ka long kaba eh hadien ka jingwanphai sha ka Champions League na ka bynta ka Newcastle, ka ban ïalehkai biang ha kane ka lympung ha ka sien kaba nyngkong hadien 20 snem.
Ka lahduh jong ka aïom ba la dep, ka Manchester City kan ïakhun pyrshah ïa ka RB Leipzig, Red Star Belgrade bad ka Young Boys ha ka Group-G.
Wat la ka City ka la rah ïa ka nam lahduh ha Europe ha ka sien kaba nyngkong mynta u snem bad kane ka kynhun jong u Pep Guardiola ka lah ban ïakynduh katto katne ki jingeh hashwa ba kan jam sha ka pre-quarter final watla ka la jop haduh 7-0 kol ïa ka Leipzig ha u snem ba la lah.
Ka Real Madrid kaba la khur jingjop haduh 14 sien, kan ïakhun pyrshah ïa ka lahduh jong ka Serie A ka Napoli, kumjuh ïa ka Braga bad ka Union Berlin ha ka Group-C.
Ka kynhun ba khlaiñ born a Germany ka Bayern Munich kan ïakynduh pyrshah ïa ka Manchester United, FC Copenhagen bad ka Galatasaray ha ka Group-A.
Kumba ka paw ka United bad ka Bayern ki la ïakynduh teng haduh 11 sien ha ka Champions League bad kawei kaba pynsah kynmaw ka dei ha ka jingïakhun final ha u snem 1999 ha kaba ka United ka la khur ïa ka jingjop.
Kine ki klob ki dei kiba la pyrshang ban soi ïa u Harry Kane ha kane ka ïew ïathied rangïalehkai, hynrei utei u rangïalehkai shakhmat ka England u la jied ban leit ïasoh sha ka lahduh jong ka Bundesliga.
Ka Inter Milan kaba la wan ba-ar ha ka aïom ba la lah, kan ïakynduh pyrshah ïa ka Benfica, RB Salzburg bad ka Real Sociedad ha ka Group-D, katba ka la lahduh jong ka Europa League ka Sevilla bad ka Arsenal ki la don ha kajuh ka thup jong ka Group-B kaba kynthup lang ïa ka PSV Eindhoven bad ka RC Lens.
Ka lahduh jong ka lympung LaLiga ka Barcelona kan ïakhun pyrshah ïa ka Porto, Shakhtar Donetsk bad ka Royal Antwerp kiba don ha ka Group-H.
Ha ka Group-E ki kynthup ïa ka Feyenoord, Atletico Madrid, Lazio bad ka Celtic. Ka Feyenoord bad ka Celtic ki la ïakynduh final teng ha u snem 1970, ha kaba katei ka kynhun na Netherlands ka la jop da 2-1 kol ha ka extra time.
Kane ka jingïalehkai (group) jong ka Champions League kan sdang naduh 19 tarik mynta u bnai bad kan kut ha ka 13 tarik u Nohprah, katba ka pre-quarter final kan sdang ha u Rymphang bad ïa ka jingïakhun yn pynlong ha Wembley Stadium kaba ha London ha u Jylliew jong u snem ban wan.
