Imphal, Nailur:
Ki la don kumba phra ngut ki briew kiba la ïap bad 18 ngut ki la mynsaw, kynthup arngut ki pulit pahara, ha Bishnupur bad Churachandpur distrik kiba don ha Manipur hadien ba la bteng ka jingïasiat ba markylliang hapdeng ki Kuki bad ki Meitei ha ki 72 kynta ba la leit, la ïathuh ki heh pulit ha ka sngi Palei.
Ki heh pulit ki la ïathuh ba ka jingïasiat ka la ïai bteng khlem sangeh ha Khoirentak kaba don ha Bishnupur distrik bad ka bynta kaba marjan jong ka thaiñ Chingphei bad Khousabung ha Churachandpur distrik. Kane ka jingjia ka la sdang naduh ka 29 tarik, Nailar naduh ka sngi ba u nongpynïaid shnong uba la 30 snem ka rta u la shah pynïap hadien ba ka la don ka jingïasiat ha ka thaiñ Khoirentak, la ïathuh u heh pulit.
Sa uwei pat u briew u la ïap haba na ka suloi shna hi kaba u pyndonkam u la kum bakla siat na ki bynta ka durkhmat jong u kane ka la jia hajan ka shnong Narainsena kaba don ha Bishnupur ha kajuh ka sngi, la ïathuh ki pulit. Ha kaba ïadei bad ka jingjia kaba dang shen, la ong ba ka jingïasiat kaba mynta ka la jia hapdeng ar kynhun ha kaba kane ka la sdang ha ka step jong ka sngi Palei khyndiat kynta hadien ba la sdang kynjah ka jingïasiat naduh ka sngi Balang janmiet.
Uwei u briew ïa uba la mynsaw na ka jingsied ki phngit bom na ki bynta jong ka khlieh ha ka jingjia kaba la jia ha ka sngi Balang u la khlad noh ha ka lynti ban pynpoi sha ka jaka ai jingsumar na Manipur sha Guwahati, la bynrap shuh shuh ki pulit.
