Shillong, Nailur 01
U rangïalehkai shakhmat ka Man-chester City u Erling Haaland lem bad u manager Pep Guardiola ki la ïohpdiang ïa ka khusnam jong ka UEFA kum u rangïalehkai bad coach ba kynsai jong u snem, ryngkat ka Aitana Bonmati bad ka Sarina Wiegman ha ka liang ki kynthei.
Utei u khlur ïalehkai na Norway (Haaland) u la lah ban pynkhyllem ïa u paralok ba ïalehkai lang u Kevin De Bruyne bad ruh ïa u khlur ïalehkai uba la lah ban pynurlong ïa ka Argentina ban khur ïa ka nam lahduh ha ka World Cup 2022, u Lionel Messi, hadien ba u la lah ban pynurlong ïa ka City ban khur jingjop lai sien kata ha ka Champions League, English Premier League bad ka FA Cup.
Ha ka jingïathep vote u Guardiola u la tam ïa u coach na Italy u Luciano Spalletti, uba la lah ban pynurlong ïa ka Napoli ban khur ïa ka nam lahduh ha ka sien kaba nyngkong ha ka Serie A ha ki 33 snem, bad u Simone Inzaghi uba la lah ban pynurlong ïa ka Inter Milan ban wan ha ka kyrdan ba-ar ha ka Champions League bad ruh ban jop ïa ka Italian Cup.
Ka coach jong ka England ka Sarina Wiegman ka la ïohpdiang ïa ka khusnam ‘Coach of the Year’ ha ka liang ki kynthei hadien ba katei ka ri ka la ïoh rung sha ka final ha ka World Cup mynta u snem bad ban khur jingjop ha Finalissima pyrshah ïa ka Brazil ha Wembley ha u Ïaïong.
Na ka liang ka Wiegman ka la ai burom ïa kane ka khusnam sha ka kynhun ki ‘thei ïalehkai ka Spain hadien ka jingjia ba doh ïeid u president ka synjuk ïalehkai jong ka Spain u Luis Rubiales ïa kawei na ki ‘thei ïalehkai ka Spain hadien ba ka la khur ïa ka nam lahduh ha ka sien kaba nyngkong eh ha ka Women’s World Cup.
“Ka kynhun ka dei hok ban ïoh lehkmen bad ban sngewthuh ïa kaei kaba la jia,” la ong ka Wiegman.
Katba ka ‘thei ïalehkai ka Barcelona ka Aitana Bonmati ka la khur ïa ka khusnam ‘Player of the Year’ ha ka liang ki kynthei. “Nga ai khublei ïa ka Sarina halor ki kyntien namar kam long kaba pynkmen ïa ka Spain wat la ngi la lah ban khur ïa ka jingjop,” la ong ka Bonmati.
“Wat la ngi la khur ïa ka jingjop ha ka World Cup, hynrei ngi la shah kynthoh pyrshah halor ka jingleh u nongïalam ka synjuk.”
