![Khlad 15 ngut ba pluh ka karkhana suh jaiñ ha Manila manila](https://unongsainhima.com/wp-content/uploads/2023/09/manila-720x443.jpg)
Manila, Nailur:
Ki bor pyniaid ka Philippines ha ka Sngi Thohdieng ki la iathuh ba 15 ngut ki briew ki la duh noh ia ka jingim hadien ba kawei ka iing ba ju pyntreikam kum ka karkhana suh jaiñ ka la pluh bad ingkhong khait ha ka Sngi Palei. Napdeng jong kitei kiba khlad baroh, iwei i dei i khyllung kynthei ba dang 3 snem ka rta iba don lang ha katei ka jaka ha ka por ba katei ka ding ka la bam duh ia katei ka iing.
Ki heh ka tnat pynlip ding ki pyntip ba katei ka ding ka la klang ha ka por kumba 5 baje jong ka step Sngi Palei, ha kawei ka iing ba 2 mala kaba don hapoh Manila.
La iathuh ruh ba ki don kumba 18 ngut ki briew hapoh jong katei ka iing ha ka por ba katei ka jingpluh ka la jia. Hynrei tang 3 ngut kiba la ioh phet noh shabar bad lait im, katba kiba sah baroh kynthup ia ki trai jong katei ka ïingmala, ki la sahkut bad iap hapoh.
Katkum ka video ba la saphriang paidbah hapoh ki Social Media, la iohi ia ka ding kaba klang na katei ka iing dieng bad kaba la bam duh ia jan baroh ki bynta jong katei ka iing.
Ia kaba mynta hi, ki pulit ki dang wad bniah ban lap ia ka daw kaba wanrah ia katei ka jingkem ding ha katei ka jingjia.
Katei ka ïingmala ka don ia ka ‘permit’ ban khaïi ia ki juti bad ki pla kit, hynrei la pyndonkam ruh ia katei ka jaka- ha ka ban suh bad saiñ dur ia ki sopti.