Paris, Nailur:
Ar ngut ki nong America kiba dei ki nongleit shang kai pyrthei ‘Tourists’ ki la ioh thiah hajrong ka jaka peit kai jong u ‘Eiffel Tower’ uba don ha Paris ha ka Sngi Nyngkong.
La ong ba ki nong-ap pahara jong katei ka jaka, ki la lap ia kitei ki 2 ngut ha ka step kaba bud bad ki la phah khie noh ia ki ha ka por 9 baje jong ka step Sngi Ba-ar hadien ki lap ia kitei ki 2 ngut ha ka por ba ki leit ban iaid pahara sha ki bynta ba sha jrong jong katei ka jaka jngoh kai.
Katkum ka jingpeit thuh jong ki pulit, la sngewthuh ba kitei ki 2 ngut ki la sahkut bad ioh thiah noh ha katei ka jaka namar ka jing buaid ha ka miet Sngi Nyngkong.
Hynrei, la ong ba watla kitei ki 2 ngut ki sahkut bad iohthiah ha katei ka jaka kaba ym ju shah ban rung lada la palat ia ka por ba la buh, katba kam shym don pat kano- kano ka jingma ne kim shym la pynthut ïano- ïano bad kim shym la ktah ne pynduh- pyn julor ia kino- kino ruh ki tiar kiba don ha katei ka jaka.
Ki bor pyniaid jong katei ka jaka jngoh kai, ki la rah noh ia kitei ki 2 ngut sha ka thanat jong ka tnat pulit ka Paris kaba don ha ka ‘Seventh District’ naka bynta ki jingtohkit halor ka jingsah miet jongki ha katei ka jaka khlem ka jingtip jong ki bor pyniaid.
Ka daw ba ki pulit ki shim jingtohkit bniah ia kitei ki 2 ngut ki riew shang kai pyrthei, ka long namar ba ka don ka jing byrngem pynbthei bom ha katei ka jaka ha ka taiew ba la lah. Kumta, ki pulit ki dang bud dien bad wad bniah ruh ia kitei ki nong byrngem tad haduh kine ki sngi mynta.
