Shillong, Nailur 01
Ar ngut ki khynnah ïalehkai kiba la san na ka shlem ai jinghikai jong ka Lah Bet Football Club ki la shah jied ban mihkhmat ïa ka Jylla sha ka lympung ïalehkai Sub-Junior National Football Championships ka ban long ha Malda, West Bengal.
Kine ki kynthup ïa u Medonbanshan Kurkalang bad u Robindor Kyrsian. Dangshen kine baroh ar ngut ki la shah jied ban leit shah pyntbit hapoh ka shlem ai jinghikai jong ka Bhaichung Bhutia Football Schools kaba ha Mumbai.
Te kumta na ka liang ka Lah Bet Football Club ka la ai khublei kitbok ïa kitei ki khynnah ba kin ïalehkai bha bad ban pynpaw ïa ka sap ïalehkai ba ki don khnang ba ki lah ban wanrah burom ïa ka Jylla hi baroh kawei.
Ha katei ka lympung, ka Meghalaya ka la don ha ka Group- A kaba kynthup lang ïa ka Karnataka, SAI bad ka Uttar Pradesh.
Te kumta ka Meghalaya kan ïakhun nyngkong pyrshah ïa ka SAI ha ka sngi U Blei (3 tarik), kumjuh ïa ka Uttar Pradesh ha ka 5 tarik bad Karnataka ha ka 7 tarik.
