Brazil, Nailur:
Kawei ka longkmie na Brazil, ka la shah kem noh hadien ba ka la dep ban pyniap ia la ka jong ka khun bad mait lyngkhot-lyngkhai ia ka met jong katei ka khun ha katei ka jingjia. Katei ka khun ka dei kaba la don 9 snem ka rta bad ia ki dkhot met jongka la lap da ki pulit napoh ka fridge ‘refrigerator’ hapoh ka iingsah jongki ha Sao Paulo, ha kaba la thep ia kitei ki dkhot met jongka la kumba 3 taiew kynthih.
Ia katei ka longkmie la ithuh kyrteng ka Ruth Floriano bad ka la don 30 snem ka rta. La kem noh iaka ha ka Sngi Saitjaiñ (26 tarik Nailar) bad hadien ba la kem ia ka, ka Floriano ka la phla ba ka la dep pyniap ia katei ka khynnah naduh ki 8 bad 9 tarik hadien ba ka la buaid droks.
Ia kiwei pat ki 2 ngut ki khun rit jong katei ka briew, ki pulit ki la rah noh sha ka jaka ri khyllung ka ba la buh kyrpang ban pynsah ia ki shipor katba ka jingtohkit ka dang iaid sha khmat.
Katkum ka jingiathuh jong ka tnat pulit jong ka Brazil, la ong ba ka Floriano ka la wad bniah ruh lyngba ki kor internet halor kumno ban pynsuk ia ka ba kan mait lyngkhot-lyngkhai ia ki dkhot met jong ka khun jongka, kaba kyrteng ka Alany Silva. Ki pulit ki iathuh ruh ba ka daw jong katei ka jingjia ka long tang namar ba katei ka khun kynthei kam lah ban pdiang ia ka jingiaphet lok jong ka kmie bad u kpa jongka bad ka kwah ban don ryngkat lang beit bad u kpa jongki.
Hynrei, la ong ba namar ba katei ka briew ka don jingiadei sa bad uwei pat u briew uba kam shym la pynpaw kyrteng ne pynithuh, kumta ka la pyniap noh shwa ia katei ka khun jongka ha ka por ba ka khot ia utei u briew sha ka iing jongka ha kajuh hi ka sngi.
Ka Floriano ka la iathuh ruh ha ki pulit ba, ma ka bad utei u briew uba ka don jing-iadei ki la dih ia u drok bad ki iapoi thiah lang ha katei ka sngi. Te hadien ba ka khie naba ioh thiah, ka shem ba ka khun ka la iap, hynrei ka la kyntait pat halor ka jingpyniap ia la ka jong ka khun. Katba ka la phla ba dei ma ka hi pat ba leit thep ia kitei ki dkhot met jong ka khun jongka hapoh ka fridge kaba don ha iing.
Ia katei ka kam ruh la lap da ka kmie jong utei u briew uba don jingiadei bad ka Floriano bad hadien ba la tohkit bniah da ki pulit, ka Floriano ka la phla ba dei ma ka hi kaba la pyniap ia katei ka khun ba 9 snem hadien ba ka la buaid droks. Shuh shuh ruh ka la phla ba ka la pyniap ia katei ka khun kynthei ha ka por katba ka dang shut bniat ha katei ka sngi.
Ki pulit ki iathuh ba ka Floriano ka la pyniap bad pynmong ia katei ka khun na ki bynta jong ka shadem bad ka la phla ruh ba ka la shet noh ia ki katto katne ki bynta jong ki dkhot met ka khun jongka, khnang ban ym don ba suba sniew ne sngew pher eiei halor ka jingjah rngai jongka.
La ong ruh ba ka Sngikha jong katei ka khynnah ka long ha ka 6 tarik u Nailar bad ki pulit ki dang wad bniah shuh shuh la katei ka jingjia ka la jia hashwa ne hadien jong katei ka Sngikha jongka.
