Shillong, Nailur 01
Ka Shillong Lajong FC ha ka sngi Thohdieng ka la pynbna ba la soi ïa u rangïalehkai ‘dien ba dang 27 snem ka rta na Brazil u Daniel Goncalves na ka bynta ban pynkhreh ïa ka lympung ïalehkai I-League 2023-24.
Une u rangïalehkai u dei uba nyngkong eh nabar ri naduh ba kane ka klob ka la wanphai biang sha ka I-League haduh saw snem naduh ba ka la shah pynhiar kyrdan noh ha ka aïom ïalehkai 2018-19.
“Ka klob ka la pyndep ïa ka jingsoi soskular ïa u rangïalehkai ba dang 27 snem ka rta u Daniel Goncalves. Kane ka dei ka klob kaba nyngkong kaba un ïalehkai shabar na la ka jong ka ri jong u,” la pynpaw u manager katei ka klob u Bah Habamutlang Lyngdoh.
Kumba ka paw na ka lympung ïalehkai jong ka Durand Cup, ka Lajong kam shym la lah ban ïakhun pyrshah ïa ki ar tylli ki kynhun ïalehkai Indian Super League kata ka FC Goa bad NorthEast United FC ha ka Group-D, hynrei ka la jop tang ïa ka Downtown Heroes FC kaba na Kashmir.
U la ong ba ka jingwan ïasoh u Daniel ka long shi bynta ban pynkhlaiñ ha ka bynta kaba shadien.
Kat kum ka jingïathuh da u manager katei ka klob la ong ba u Daniel u la ïalehkai na kiba bun ki klob kiba na katei ka ri kiba kynthup ïa ka Esportivo, Nova Iguacu, Artsul, americano, Duque de Caxias, Sampaio Correa-rj, Nacional-Am bad khatduh eh u la ïalehkai na ka Falcon dang -shen mynta u snem hashwa ba un wan ïalehkai sha ri India.
Haba phai khyndiat ha ka kam ïalehkai, u Daniel u la sdang ïa ka kam ïalehkai nyngkong eh na ka Artsul, Cruzeiro-Mg bad ka Vasco da gama.
