Guwahati, Nailur:
Ki shipai ka tnat Assam Rifles ha ki saw snem ba la leit ka la ïoh ban kurup ïa u drok uba la kot sha palat T. 4,200 klur ha ka ïew bar ri, la ïatuh u Director General of Assam Rifles PC Nair. U la ong ba nalor ka jingpahara ha ki bynta khappud, ki shipai ka tnat Assam Rifles ki la ïai bteng ban ïakhun pyrshah halor ka kam khaïi drok bad ka jingshalan beaiñ ïa ki tiar siat bad na kum kine ki jingpyntreikam ka la ïoh ban kurup ïa u drok ba la kot sha ka T. 4,267 klur ha ki saw snem ba la leit.
“Ngi la ïoh ïa ka jingjop ha kaba ïadei bad ka jingkurup ïa ki song jong u drok. Ha u snem 2020, ngi la ïoh ban kurup ïa u drok uba la kot sha ka T. 875 klur, ha u snem 2021 la ïoh ban kurup da kumba T. 1,402 klur bad ha u snem 2022 da T. 855 klur. Ka la don ka jingïapher jong ka jingdon ka jingïoh kurup drok hapdeng u snem 2021 bad 2022 ha kaba la ong ba kane ka lah ban long na ka daw jong ka jingdon ka jingïakynad kaba la jia ha khappud Indo-Myanmar ha kaba ki shipai Myanmar ki la pynibor pyrshah ïa ka kynhun shipai PDF (People’s Defense Force), CNA,” u la bynrap. Ki shipai ka tnat Assam Rifles ki la ïoh ban kurup ïa u drok uba la shongdor da kumba T. 1,135 klur tang ha une u snem, la ïathuh shuh shuh u Director General.
