Geneva, Nailur:
Katba ka Europe bad kiwei ki thaiñ jong ka pyrthei ki dang mad ia ka jingkhluit bad jingshit kyr-ang jong ka suiñ bneng, ka tnat wad bniah jong ka United Nations pat ka la iathuh ba ka jingkylla jong ka suiñbneng kan wanrah jingma ia ka pyrthei baroh kawei namar ka jingkhluit kaba jur kan wan ha ki sngi bad ki snem ban wan.
Kumba, la iohi hi ba ka jingkylla ka suiñ bneng ka long ka mat kaba ki stad saïan bad ki riew shemphang jong ka pyrthei ha kine ki sngi ki ju iakren bha bad ka long ruh kaba ap jingma haduh katta lada ki ri ka pyrthei baroh kawei kin leh bym suit ñiew ia kane ka jingkylla ka suiñ bneng. Ki ri kiba la ioh mad lypa ia ka jing khluit bad jingshit kyr-ang jong ka sngi naduh kine ki por ba mynta ki kynthup ia ka Greece, Spain, Canada bad kumjuh ruh ka Hawaii.
Namar la ong ba ka jingkhluit ka suiñ bneng ha une u snem, ka la wan kloi, ka neh slem bad ka la kham khluit shuh shuh ban nia kaba ju long ha kiwei pat ki snem ba la leit bad ia kane la sakhi da ka tnat World Meteorological Organization (WMO).
Kumta ruh la ong ba ka ‘Global Warming’ lane ka jingtyrkhong jong ka pyrthei kumba ju tip lyngba ki kot pule ha ki por ba la leit baroh shi katta, la i-kumba kane ka la wan jia noh ha kane ka juk ba mynta bad kam i-ap slem shuh ia ka pyrthei ba kan ioh mad ia ka jingkhluit bad ka jingtyrkhong kaba jur.
Hynrei, kaba eh ka long ba ki briew kim pynleit jingmut bad kim shim khia ia kane bad kim poi pyrkhat ruh ba katei ka jingeh ba ka pyrthei ka dang lait baroh shi katta, ka la wan urlong ha kane ka por ba mynta.
