U Nongsaiñ Hima, 1980
Kan jia kumno ïa ka pyrthei lada ka KTIEN kan duh noh ? Sngewshyrkhei ban pyrkhat ïa ka apot ha ka pyrthei lada kane ka wan ban urlong shisha. Ka don kaei kaei kaba maiñ ha ka KTIEN. Ha ka, don ka bor kaba lah ban pynlong ïa kiei kiei.
Ha ka ruh, ka don ka bor kaba lah ba pynduh pyndam bad pynjot thiaw ïa kiei kiei. U Ioannis Apostol haba u kren shaphang jong ka, u ong, “Myndang nyngkong ka la don ka Ktien bad kata ka Ktien ka la don bad U Blei, bad kata ka Ktien ka la long U Blei. Kane ka la don bad U Blei naduh myndang nyngkong. Da ka la thaw ïa kiei kiei baroh, bad khlem ma ka ym shym la thaw eiei kaba la thaw. Ha ka hi la don ka jingim, bad kata ka jingim ka la long ka jingshai jong ki briew. Bad kata ka jingshai ka la shai ha ka jingdum, bad ki jingdum kim lah ban klun ïa ka.”
Ka tynrai u Khasi ruh ka long ba u ñiew kyntang ïa ka Ktien. U da thew haba u kren ïa ka. Um ju nud ban pyndonkam thala ïa ka. U Tip shai ba shisien u la pyndonkam kulmar ïa ka KTIEN u la duh la ka longrynnieng. Wat ba ka sngewbha, kum ka la siat thong, u Khasi u kren da tyng-kai ïa la ka KTIEN. U Sngewthuh ba u tang shu la bakla ka KTIEN, kata u la rem. Nangta ngi ju ong ba uta uba ai ksuid. Ym dei ba u phah da u ksuid ne u don ka bor ba pynshitom pynjynjar ïa uno uno uba la pynmong pynsngewsih ïa u. Em, u pynphai tang da ka ktien ïa kaba uta uwei pat u la kren lait bad kata hi ka la biang ba pynshitom pynjynjar ïa u. Bunsien ngi ju iohsngew ruh ba don ki briew kiba ngi ong kiba kthang ktien. Shisien ba ki la tim ïano ïano, uta uba shah tim u da kylla mrad artad.
Ha ka jingshem jong ki riewstad kiba mynta la ong ba kila ong bay m don kawei pat ka bor ka ban kham khlaiñ haba pyndonkam bha ïa ka bad ka ban kham shyrkhei haba pyndonkam bakla ïa ka,ban ïa ka KTIEN.
Ki riewstad kiba ha ka ktien phareng, ngi khot ki “psychologist,’ la ong ba ki lah ban pule ïa ka jinglong jong u briew, kaba paw bad kaba rieh kumjuh ne ban tip ba u mioh na ka iïng ka sem kaba kumno bad kumta ter ter tang da kaba bishar ïa ka KTIEN kaba u pyndonkam ha kaba u kren.
Ka jingmaia kaba don ha ka KTIEN ka long kaba palat da shisha ïa ka bor sngewthuh u briew. Hynrei kiba bun ki klet ïa kane. Ki kren ia ka ktien khlem pyrkhat, ki kren mon, ki kylla ktien, ki thok, ki shukor bad ki ju pynksan ïalade da kaba ong, “Sa lei, la rat ïa ka ktien kaba ioh ei.” Dei na kane ka dawn ba mih kat kine ki jingkulmar ha ka pyrthei. Dei na kane ka daw ba ki ri kiba khraw ki duh ki dam noh. Ka long kaba shongnia bad ba dei hok ba haba shwa ba ngin kren ngin da puson bha namar ka KTIEN kaba la khlei ka long kum ki sner ba la bret ha ka lyer. Kumba ka long kaba shitom ban lum pat ïa kita ki sner kiba la shah kit ha ka lyer kumjuh ruh ka long kaba kham shi-tom shuh shuh ban lum biang ïa ki ktien kiba la khlei.
