Kurup drok ki shipai Assam Rifles bad ka tnat Excise

Aizawl, Nailur:

Ki shipai Assam Rifles bad ki heh ba dei khmih na ka Excise and Narcotics Department ki la ïoh ban kurup da kumba 912 Grams u Heroin uba la kot sha ka T. 6.38 klur ha ki ar tylli ki jingpyntreikam kiba la long ha Champhai distrik hajan khappud Myanmar, kane ka la long katkum ka jingthoh ba la phah da ki shipai ka Assam Rifles ha ka sngi Thohdieng.

Kum shi bynta ban leh ei ei haba la ïoh jingtip halor kane, ka kynhun ba la ïatreilang hapdeng ki shipai Assam Rifles bad ka Excise and Narcotics Department ka la ïoh ban kurup ïa kumba 852.16 Grams u Heroin ha ka shnong Bethelveng jong ka Champhai ha ka sngi Palei, la ïathuh shuh shuh ka jingthoh.

U nongshong shnong jong ka Myanmar uba la 34 snem ka rta ïa uba la tip kyrteng kum u Thangmanglian u la shahkem halor ka jingrah jong u ïa u drok uba la kot sha palat T. 5.96 klur, la bynrap ka jingthoh. Ïa u Heroin la song ha ki 70 tylli ki jingthep sabon.

Ha kawei pat ka jingpyntreikam ki shipai ka Assam Rifles ki la ïoh ruh ban kurup ïa 60.2 Grams u Heroin uba la kot sha ka T. 42.14 lak ha Chhungte, kaba ha Champhai distrik, la bynrap ka jingthoh.

U Lalrinmuana (32), uba dei u nongshong shnong jong ka Khawzawl, u la shahkem ha kaba ïadei bad ka jingrah jong u ïa ka song jong ki jingdih pynbuaid, ïa kiba la song ha ki san tylli ki jingthep sabon.

Ïa kine baroh arngut la aiti sha ki heh jong ka Excise and Narcotics Department na ka bynta ban leh ïa kaba donkam, la ong ka jingthoh.