Warsaw, Nailur:
Ka Poland ha ka Sngi Saitjaiñ ka la kyntait halor ka jingkynnoh ba ka liengsuiñ jong ka tnat shipai katei ka Ri ka la leit tam ia u pud u sam ka haw-haw jong ka Belarus bad ka la pynksan ba kine ki long tang ki jingkynnoh ba khlem nongrim jong Minsk ban wanrah ia ka jingduh shaniah na ki paramarjan ri jong ka Poland.
La ong ba ka jingiadei hapdeng ka Minsk bad ka Warsaw ka la sdang ban sniew mynta la kumba katto katne snem bad kane ka la nang pynsniew dur ia ka jingiadei jong ki hadien ba u heh nong-ialam ka Belarus, u Alexander Lukashenko u la ailad ia ka Russia ba kan pyndonkam ia ka ri jong u ban leit hiar thma ia ka Ukraine.
Ka Belarus ka la pyntip ba kane ka la jia hapoh jong ka thaiñ Grodno ha ki bynta khappud jong ka.
