Shillong, Nailur 03
Ki nonghikai skul Lower Primary ha Meghalaya kiba don hapoh ka synjuk jong ka All Meghalaya Primary School Teachers’ Association (AMPSTA) kin ïasnoh kti lang ha ka ‘Bharath Yashtra’ kaba dei ka jingïakhih kaba pynlong ha India baroh kawei da ka All India Primary Teachers’ Federation (AIPTF) ha ka Lah Sngi U Blei, ka 4 tarik Nailur, 2023.
Ha nongbah Shillong, ka jingïaid paidbah kan sdang ha ka por 10 baje mynstep na Dorbar Hall Golflinks ter ter sha surok ïew Polo, surok sha lyndet ka City Dhaba, MLA hostel, DC office, Nanpolok bad phai biang ban pynkut sha ka jaka basdang ïa ka jingïaid paidbah.
Ha kane ka jingïaid paidbah, ki nonghikai ha Rilum Garo ruh kin ïashim bynta da kaba pynlong ka jingïaid paidbah ha Tura.
Kumta ka AMPSTA ka la kyntu ïa baroh ki nonghikai skul Lower Primary kiba dei jong ka Sorkar bad Deficit ban ïashim bynta lang ha kane ka jingïaid paidbah da kaba shim shuti (mass casual leave).
Ki jingdawa ki long ban dawa biang ban pyntreikam ïa ka baibam barim (old pension scheme), ka jingthung nonghikai kaba tikna, ka jingsiew tista ïa ka tulop ki nonghikai kiba dei Deficit, ban pyllait ïa ka 4th installment jong ka 25% revised pay jong ki nonghikai deficit, bad ka jingai jinghikai kaba bha sha ki khynnah bad kiwei kiwei ki mat jingdawa.
Ha ka 5 tarik Nailur kata ha ka Sngi Ba-ar, kan don sa ka jingïalang ha Guwahati ha kaba yn pyllait ruh ïa ka bos Bharath Yashtra’ ka ban ïaid kylleng ban poi sha nongbah Delhi ha ka 5 tarik Risaw, 2025.
